克勤契仔倒戈過檔講波

李克勤昨日於記招獲委任為「now TV 2012年歐洲國家盃大使」，身為無綫契仔的克勤似有備而來說：「如果呢個世界有守齋，我都守咗差不多2年，我啲小朋友話唔可以只係食齋，要食吓肉先營養好，喺適合時候做適合嘅事，最緊要過到自己。」

無綫仲係娘家

克勤坦言扑錘亮相now，有部分原因是因為由無綫過檔now的高層何麗全接洽，他強調除主持有關足球賽事外，並無其他合約在身，樂意與任何電視台合作。問到克勤會否擔心無綫嬲？他說：「冇講過唔返，對我嚟講係娘家，但冇辦法，唔係唔做係冇機會，主動權唔喺我手。」克勤又笑言阿仔畀壓力，他說：「要食飯、交學費，阿仔都問冇喺電視見到我，藝人成日唔喺電視見有影響。」

何麗全截短訊

不過克勤否認決定是受挖角潮影響，至於王維基有否向他埋手？他就笑言未有收到對方短訊，應該被何麗全全數攔截，記招結束後，克勤更破天荒現場以廣東話接受now電視台訪問。

何麗全透露成功爭取播映權後，即想起克勤為不二之選的主持，他坦言明白對方首次到無綫以外電視台亮相有一定壓力，由六月開始與克勤商議，他說：「佢考慮咗幾個月，（佢係無綫契仔？）都有傾過，有同佢分析過，今次淨係歐冠盃，唔會綁住佢，（簽埋克勤？）未有能力簽巨星。」另外提到無綫挖角潮，何麗全就大讚無綫根基好，應該不受影響。

文：音樂組