陳法蓉改電話撇仔

陳法蓉感情路暫未能開花結果,但她對結婚仍有憧憬,尤其期待童話式的愛情,自覺在這方面太過執着。

幾段愛情冇結果,我有檢討過,係我執着於愛情一定要愛到死去活來,要童話式嘅真愛,同我拍得拖,一定要係我好愛嘅,亦要識得欣賞我嘅優點,包容我小器嘅缺點。外間感覺我好獨立、好堅強,其實我都係一般會扭計、會嗲、會發爛渣嘅普通女人。

喜歡孝順仔

有朋友完咗一段感情,會好快就再拍拖,鍾意不斷拍拖,但我唔會,都係要等一個我好鍾意嘅人出現。之前蔡少芬知道我鍾意孝順、最好係講笑話叻嘅男仔,想介紹畀我識o架,哈哈哈……不過身邊嘅朋友都會為我心急,會安排相睇畀我,如果事前知道,我一定唔去,因為覺得好肉酸,試過去到發現多咗件,就知咩事啦!明顯製造機會,有次聚會突然多咗個人,但又唔合眼緣,仲要禮貌地交換電話喎,哈哈哈……之後為免同嗰個人接觸而即刻改電話號碼。

好心做壞事

我覺得啲朋友好心做壞事,佢哋應該事前話畀我知,由我決定嚟唔嚟。不過以前嘅我係極之抗拒,因為畀我嘅感覺係,我肯嚟就好似肯同佢拍拖咁,但依家個人大咗,咪覺得當識多個朋友囉,依家冇咁執着,放鬆咗,冇刻意去諗多咗,不過遇到唔鍾意嘅,都係唔會畀電話,咪畀個Email佢囉。

陳法蓉口述

筆錄:影視組