Regen Winkie求真愛 唔要威
HotCha成員Regen已踏上征途，赴外地升學，但她在起程前，與好姊妹Winkie一齊接受好友官恩娜（Ella）訪問，正所謂三個女人一個墟，三女甫見面即天南地北談個不停，戀愛拍拖話題當然離不開，Regen與Winkie都擔心圈外男仔與自己拍拖是為了帶出來威，對Ella公開與老外戀情大表羨慕，更踢爆Ella男友是內斂的「斯文老外」。
官：官恩娜
W：Winkie
Ｒ：Regen
戀圈外男擔心有目的
官：係咪覺得圈內女仔特別難識到異性？驚人哋鍾意你啲名氣？
Ｒ：都會擔心同諗多咗，以前會諗得好簡單，有好感就可以試吓一齊，但依家會諗究竟對方識我係對我有興趣？定係對我嘅職業有興趣呢？
官：你嗰種可愛係人都鍾意，我係男仔一定追你。
W：我身邊好多男仔都鍾意Regen，鍾意佢瞇瞇眼同娃娃臉，覺得佢細細粒好容易保護。
官：Winkie你都好正吖，你咁好傾，同你拍拖一定唔會悶。
W：我同意Regen咁講，入咗行之後出面啲男仔追自己時，係會驚究竟佢係搵我去威，定係真心鍾意自己，好多時男仔都會有嗰種優越感，覺得拖個女朋友出嚟要型。
Ｒ：Ella你真係好好呀，拍拖可以公開。
似playgirl超專一
官：（風騷）祝福我啦，其實我每次戀愛都好投入，鍾意一個人係好認真，雖然有啲人覺得我有啲playgirl咁，但我係超認真超專一！
W：但如果有個男仔真心愛你，又想拖你出去威咁點呢？
Ｒ：咁佢保護你應該唔會周圍講o架嘛？
W：有啲男仔見女朋友着咁少布就會話，「嘩，你唔好着咁少布啦，畀人睇蝕晒」，但我覺得啲男仔應該話「我女朋友着起呢件衫好靚」，因為你都想女朋友着件衫出嚟畀人讚嘛！
官：我識得個男朋友嘅老竇叫佢女朋友唔好着短褲。
W：關佢男朋友個老竇咩事呢？
官：因為佢老竇大男人。
Ｒ：咁你揀同外國嘅男仔拍拖係咪覺得佢哋casual啲？
官：外國人都可以好保守o架，只係大家認為外國人就一定好開放，佢哋都好似亞洲人咁有唔同種類，我嗰個有一半血統係中國人。
W：你男友都幾斯文，仲瘦咗少少添！
Ｒ：同埋好內斂。
W：唔係個個藝人都肯公開戀情，但Ella就有呢個勇氣，佢唔單只做到一個事業型女性又可以拍拖，做到雙線平衡，真係好叻。
Ｒ：Ella係咪好肯定依家男友係你嘅「The One」？
官：咁你同得佢拍拖一定係認真o架，唔會諗呢個只會拍兩個月就散嘛，冇人一開始就決定談一場「玩嘢」嘅戀愛。
慶幸冇被人放毒蛇
官：我成日都覺得女子組合喺台上會大膽啲、力量又爆發啲，但我就要自己一個去面對上台壓力，同埋我一驚就不停飲水、去廁所。
Ｒ：最深刻拍《有房出租》後，覺得你好性感，但原來你係可以好搞笑，依家仲加份可愛添！尤其拍劇時成日食嘢，未開拍已將啲道具食物食晒，佢勁鍾意食罐頭鮑魚片。
官：哈哈，好彩佢哋有「士啤」……我入行早你哋三年，咁會唔會好大姐姐？
W：你平時嘻嘻哈哈，但一做嘢就好嚴肅、好大姐姐嘅感覺，最深刻係你自己化妝，仲好快手喎！
Ｒ：點解你啲皮膚咁好嘅？
官：完全唔係，你哋都自己化妝啦，自己化妝會快啲。
Ｒ：我哋初入行時唔係好識化o架，有化妝師仲話我個樣化完好似畀車輾過咁，哈哈，你平時嘅護膚心得係咩？
官：以前我真係會半夜三更攞住化妝品學化妝，入行之後經常畀唔同化妝師化，基本上每個化妝師嘅手勢都唔同，可以從中「偷師」，加上自己有興趣，慢慢就學到嘢，我見過你哋互相幫對方畫眼線啦，心諗你哋又信得過對方嘅，真係好可愛，好由心而發。
W：當初一出道真係唔識，畀化妝師話我哋化到好街頭，畫到條眼線好粗，又唔識打陰影，化到塊面好腫。
知心友唔易找
官：第一次真正留意你哋個樣，喺電視城化妝間，覺得呢三個女仔好有活力好可愛，我就係失去咗嗰份少女情懷。
Ｒ：平時我哋好少傾心事，但就乜無聊嘢都講。
W：Ella同我哋性格好似，行埋去唔會覺得接觸唔到佢，佢好nice。
官：真相係咩？笑騎騎放毒蛇……好多人都會問我，好多女仔入行後會互相競爭，會唔會呢行難識到知心朋友？
Ｒ：我哋07年出道嗰班新人全部都好好，包括鍾舒漫同江若琳，好彩冇接觸到呢類（放毒蛇）女仔，我哋成班耐唔耐會約出嚟食飯，所以都幾開心。
W：未入行前好多人會覺得娛樂圈係大染缸，父母又擔心呢行人事關係會複雜，又或者女仔會勾心鬥角，但入到嚟又唔係想像中咁壞，其實好睇番個人品質，當然唔同女仔會有唔同性格，一定會保護自己先，冇都係呃你，但我相信keep住自己純真嘅性格可以感染到人。
官：係呀，我都係畀你哋融化咗，當然我唔係奸人，唔係「玉瑩小主」嗰啲，首先我唔會搞人，而佢哋又唔會傷人，當知道大家都係同道中人就可以做到朋友，所有嘢都係雙方。
Ｒ：女仔直覺性好強，會感覺到對方係咪好人。
W：即係好似磁石咁，係嗰堆磁石就會吸番埋一堆。
官：有冇遇過唔好嘅人？
Ｒ：好少囉，後期就會feel到有啲唔係好志同道合嘅朋友。
W：不過入咗行真係少咗朋友，亦唔會係人都叫baby或朋友，總之人愈大，真心嘅朋友就會愈少，當然唔係自己想，係真係冇。
後記
Ella初出道時臉圓圓、身形又腫又脹，更曾被嘲笑為「肥官」，為了打破此稱號，Ella每朝早拚命跑步減肥，時至今日不但瘦身成功，更愈來愈懂裝扮，一舉手一投足充滿媚態。而訪問當日，對於自己身形大感滿意的Ella摸摸自己的瓜子臉笑言：「我真材實料o架，冇做過手腳！」
攝影：吳文聰
記者：倪小珊
髮型：Eve Chiu
場地：千鶴日本料理@都會海逸酒店