江若琳灌奶增肥舉鐵博入奧運

江若琳、杜汶澤、恬妞、徐正曦和小肥主演的寰宇新片《高舉愛情》,昨日舉行開鏡拜神儀式。戲中飾演舉重運動員的江若琳,手瓜起𦟌的她更即席示範將一個十公斤的啞鈴舉起,其驚人的體力和標準的姿勢,明顯花過不少時間和工夫操練,她說:「之前搵咗專業舉重教練練咗一個星期,我每日都要舉重接受地獄式特訓。」

體重狂升十磅

江若琳透露為了電影更需要增磅演出,至今已上升了十磅,她說:「增肥比減肥仲難,我要飲增肥奶粉,飲到自己都想嘔。又要食增肌蛋白、狂食漢堡包、乾炒牛河都食。」她笑言不擔心日後「瘦唔番」或有「厭食症」,並說:「如果體形大份咗咪參加埋奧運,唔好嘥。」同場,師弟徐正曦表示於戲中做一名蠱惑仔,並刻意將頭髮染金配合造型。

與阿澤做一對

江若琳戲中除了增肥演出,更會素顏和剪掉長髮配合演出,為電影作出重大犧牲,相反杜汶澤則要減磅演出,與江若琳做一對,他說:「我減咗廿磅,之前跑步跑到要針灸,年紀大咗好難減。」他表示早前監製的電影《前度》已邀得恬妞合作,今次更有機會一同演出。恬妞表示剛完成兩部電影和三部劇集,感覺很神奇。

文:影視組