光良烏龍驚魂嚇餐飽

光良近幾年經常為宣傳唱片四出做騷，他記得幾年前遇上「驚險」事件，事緣他和幾位大陸歌手到內地一偏遠落後的地區做騷，晚上他和同行的歌手及工作人員返酒店回房休息。當他經過某工作人員的房間時，戲言他的房間對正墳墓，陰氣極重，叮囑對方要小心有「不速之客」，之後他和另一工作人員回房睡覺。

唸經唸天亮

但光良睡到半夜，被一「𠵱𠵱嘩嘩」的怪聲吵醒，當時他心頭一涼，偷望隔籬床的工作人員追查怪聲源頭，但又見房友正熟睡中，令他更相信怪聲是發自鬼怪，他說：「我驚到全身標冷汗，不停咁唸聖經至天亮，全晚都冇得瞓。」

夢話發怪聲

直至翌日早上，光良才敢起床，但眼前的景象讓他大嚇一跳，他謂：「我見到畀我嚇親嘅工作人員瞓喺地下，怪聲係由佢發出，佢發開口夢！我問佢點解瞓喺度，佢話因為太驚關係，所以叫同房開門畀佢『打地鋪』。」

光良大呻白白驚了一整晚，但想深一層全因他一句戲言才鬧出笑話，他說：「我以後都唔會亂講嘢！」更形容自己是罪有應得。

採訪：音樂組

髮型：Sunny Yu＠Hair Culture

化妝：Marsha Ma＠A&V Makeup School

服裝：izzue＠i.t