舒淇恨假唔恨嫁
感情未有着落的女星舒淇，昨晚出席時裝店活動時，因趕戲以致雙眼滿布紅筋，她笑言現階段恨「假」，不恨「嫁」，無懼繼續當剩女。
昨晚舒淇為Emporio Armani（EA）專門店重開擔任剪綵嘉賓，她以品牌2011春夏裝示人，但雙眼布滿紅筋，看來相當疲倦，不過，拍照時她動作多多，又晒V又擺歡迎手勢，還入店舖內揀選披肩試上身，認真識做。舒淇稱剛由台灣來港，正忙於拍攝由鈕承澤導演的電影《LOVE》，一臉疲倦的她表示為趕戲已連續多晚開通宵：「我有二十幾個鐘冇瞓過，今日特登嚟見你哋。」
提到好友林熙蕾婚姻美滿兼大肚，問幾時輪到她？舒淇即笑言等對方介紹。問舒淇可介意姊弟戀？她說：「凡事冇絕對，只有感覺啱同唔啱。（最細可接受幾歲嘅男生做男友？）我唔會定，試過有個大過自己十歲以上嘅男人追我，可能我早熟，同年紀差唔多嘅人溝通唔到。」問她是否正在等愛時？舒淇大玩食字：「唔係，我等假，係放假嘅假，而唔係嫁人嘅嫁。我返到屋企即時瞓着。」
遭林熙蕾寸肥
其後，舒淇又自爆早前遭林熙蕾寸，她說：「佢好寸！我之前同佢講我肥咗3kg，佢話佢依家個肚七個月，都只係重過我1.5kg，仲叫我畀心機減肥。」
另外，舒淇透露今次是第三季擔任品牌Image Girl，問到酬勞，她只肯說：「佢冇減我價，大家合作好開心。」早前舒淇隨品牌到紐約拍宣傳照，並於某廢棄場內取景，舒淇誇讚場面勁電影，品牌掌舵人Mr Armani還專程帶備朱古力到現場探班，對舒淇十分重視。
同場「日本通」王友良帶同韓星蔡恩真、兩名日模小水彩及Anna Y.到場。有指Anna Y.是名媛葉梁美蘭契女，她解釋：「我哋唔係真正上契，佢識我家姐，上個月佢嚟日本，我帶佢周圍去玩，大家做咗朋友。」
文：名人組