阿Sa送BB衫賀前夫

Twins踏入10周年，除明日推出新專輯外更推出紀念產品，昨日兩人出席「GROUND ZERO X TWINS 10」記者會，一系列紀念產品由結識十年的兩名設計師好友Eri及Philip操刀，設計了Tee、環保袋、太陽眼鏡，電話套及手錶等，阿Sa和阿嬌穿上紀念Tee造型現身，兩人表示圖案中的熊仔都換上Twins演唱會經典造型別具紀念性，兩人更謂有參與設計。因為限量推出，阿Sa表示已預留幾套自己收藏，身邊的好友都表示要買來支持。

阿嬌即叫自己買

至於可有其他想設計？阿Sa竟沒有避忌說：「好想呢個系列推出BB仔衫。」正值前夫鄭中基（Ronald）剛榮升老竇，而好友杜汶澤更指BB女眼仔似足Ronald，阿Sa表示：「係咩！（咁會唔會將BB衫送畀Ronald？）咁都要等出咗先。」阿嬌則說：「佢咁有錢自己買啦！」阿Sa反大方說：「唔係好貴嘅。」問到可真會送賀禮給Ronald時，阿Sa坦言：「我諗遲啲先，起碼冇咁多人追訪先啦。」

調理身體做媽咪

Ronald榮升老竇，阿Sa可心急做媽咪？她笑言：「見到身邊好多朋友都生咗BB，圍埋都講生仔經，真係要快啲生，但等我調理好身體先，身體太差嘞。」另外，阿澤在微博上載了一張與Ronald頭貼頭穿結婚禮服的合照，原來兩人拍攝電影《嫁個100分男人》煞科，阿澤更讚Ronald當了「星爸爸」。

文：音樂組