黃宗澤齋裸嫌悶遮掩好睇啲
黃宗澤出席活動時篤爆女友胡杏兒冇膽着三點式玩浮潛，近來身材成焦點的他再被追問有冇意思拍全裸寫真時，嫌全裸太悶，遮遮掩掩好睇啲。
黃宗澤（Bosco）昨日出席《夏日水都之3D互動水族館》活動，他對現場設置的水族館大感興趣：「好靚！細個都有養過淡水魚，不過要成日打理，好貴、好難養！」
無奈Pat Pat成焦點
Bosco表示愛潛水睇海底世界，但因冇牌要教練陪潛，更透露媽咪比自己更型，比他快考到潛水牌。問到女友胡杏兒曾否一齊旅行玩潛水，他笑說：「未潛過水啊，有浮潛過，（佢有冇着三點式浮潛？）佢唔夠薑，佢游水唔係好叻o架喳。我阿媽着三點式就得，佢身材好勁o架，三十年前。佢考完牌送套三點式畀佢，送埋潛水衣『打面』！」
Bosco結實的臀部近日成為焦點，被問到會否拍內褲廣告時，他一臉無奈說：「好舊啦，問咗好多次。（全裸寫真？）等啲後生嚟啦，（幾位數字肯拍？）好悶啊，又問呢啲嘢。」
再問到由那個名師操刀才肯「就範」時，他說：「夏永康，同埋外國嘅都唔錯，其實唔係錢嘅問題，最緊要靚。你哋有冇咁有興趣睇我全裸啊？遮遮掩掩好睇啲，齋全裸好悶！」Bosco將到東南亞登台及宣傳，下月頭為黃柏高的愛情喜劇開工。
文：專案組