霆鋒冷笑發功Edison黑面速閃
謝霆鋒跟死敵陳冠希（Edison）昨日冤家路窄，當霆鋒在中環整頭時，過氣情敵Edison竟突然殺出，被大批傳媒秒殺追擊，惟當Edison收料後即聞「鋒」速逃。相反，霆鋒獲悉跟Edison幾乎狹路相逢時就不屑冷笑，擺明不放對方在眼內。
謝霆鋒、張栢芝和Edison的三角錯竟沒完沒了，當年栢芝和Edison的慾照風波，令鋒希好友反目，怎知栢芝卻於5月跟她口中「貓哭老鼠假慈悲」的Edison來個機艙自拍，引爆鋒芝婚變危機。
衣着風格接近
千算萬算，估不到機艙自拍相隔2個月後，昨日輪到霆鋒和Edison在中環冤家路窄。昨日戴cap帽、穿牛仔褲繼續踢拖的霆鋒，去完天后睇脊椎骨醫診治舊患後，於4時40分到皇后大道中的陸佑行，往樓上的髮型屋剪髮。怎知半小時後，死敵Edison竟突然在樓下出現，還巧合地同樣戴cap帽着牛仔褲現身，兩人品味相同不知是喜是悲。
初露風騷笑容
由於有大批記者在陸佑行樓下等霆鋒，當Edison身影乍現，記者立即朝他衝前喪跑，Edison呆一呆望後面還以為有事發生，當被記者秒殺包圍後，他還露出風騷笑容，記者問Edison去邊？他頭岳岳周圍望：「我都搵緊路。」還八卦反問記者：「你哋喺度做乜？」有記者抵死說：「你老友（霆鋒）喺上面整頭。」
Edison聞言十分錯愕，牽強笑一笑，即時變臉唔理記者，跟友人邊說邊走，記者再問他：「仲有冇同栢芝聯絡？」Edison繼續不出聲，一支箭標入振邦大廈，與霆鋒身處的陸佑行只有十幾步之距。
離奇笑得燦爛
或許Edison知道跟霆鋒同時身處中環，為免夜長夢多，逗留了不夠20分鐘即撇下友人速閃，還跑過對面馬路避記者，離去時黑面勁cool，刻意不望記者，掂行掂過。
約1小時後，霆鋒剪完髮出來，記者即問他：「啱啱Edison出現？」霆鋒愕然說：「係咩？」然後冷笑一聲，記者再說：「係呀，佢啱啱喺呢度行過。」霆鋒冷冷說：「呢度好多人經過。」問還有沒有嬲Edison？霆鋒chok住笑冇出聲，助手表哥即阻止記者再問，記者轉問霆鋒：「你依家心情點？」他露齒而笑，笑容愈來愈燦爛，耐人尋味，臨上車時說：「我返去啦！」然後返金鐘栢舍。
採訪：音樂組