陳法拉最愛男友街坊look
與男友薛世恒拍拖多年的陳法拉揚言喜愛對方穿拖鞋短褲，可惜對方總要時常保持行政look，未能令她如願以償。
陳法拉與劉心悠昨一同到澳門為翟威廉代言的男士服裝店擔任剪綵嘉賓。剛拍完劇集《潛行狙擊》的法拉今次做騷搵真銀之餘，更可以順便逛逛澳門。與翟威廉同一經理人的她今趟純粹支持對方，未有八卦他與陳庭欣的新聞，因為自己都常被人八卦，故明白對方的感受。
隨時單拖旅行
被問到有否幫男友置裝時，法拉表示自己閒時都會睇男裝，她說：「不過佢就挑剔，着嘅西裝個cutting要靚，所以要等佢自己試先會合身，但我得閒都會買casual wear畀佢。（對佢穿着有咩要求？）想佢着拖鞋短褲，雖然我喺外國慣咗，不過佢就唔慣，成日都要着住行政裝。」而二人就未有機會一同旅行，因為男友未有假期，故她或者會自己去。
讚嘉穎好前輩
另外，劉心悠透露自己現時至少要還三個廣告債，所以要勤keep fit，她謂：「體重就無變，不過去咗好多水腫，依家會跑步、返屋企就行樓梯去令到個身形firm啲。」而剛於內地拍完自己第一套古裝劇《步步驚心》的她表示想再拍古裝，現時與該劇劇組人員都依然有聯絡，包括拍檔鄭嘉穎，她說：「我有請佢去睇我套舞台劇，估唔到佢真係嚟。（佢係你杯茶？）同佢再熟啲先答你，不過佢係一個好前輩。」