霆鋒除黑超憔Look暴現

向來又Cool又Chok的謝霆鋒，昨凌晨以慣常風褸型仔Look、戴黑超登機啟程往北京，但昨午卻換上沉實黑色恤衫、牛仔褲出席記招，更被本地時裝設計師鄧達智形容為「慘淡流浪Look」。鄧達智稱：「佢Casual（簡便）得嚟有啲殘，畀人好冇心機、是但嘅感覺。佢平時會Chok啲，今次好Out of我嘅expectation（期望），可能想配合佢灰色嘅心情啩！」他又指霆鋒明顯欠缺睡眠：「正常佢會戴太陽眼鏡遮住，今次特登唔戴，可能想畀人睇吓佢有幾慘！」

動作多多 反映矛盾

記招期間，霆鋒主動開口回應婚變，有別其一貫封嘴避談家庭事作風，演講期間動作多多，大部分時間單手插袋，更不時擔天望地，時而掩嘴、時而舉起食指做手勢。講到收到栢芝短訊表示很愛他很想念他時，更Chok樣望觀眾堅定表示：「我相信！我相信！」滿臉嚴肅的他明顯跟往日Cool爆個性不同，少了三分Chok氣、多了七分滄桑。

藍天心理諮詢中心臨床心理學家鄒凱詩認為霆鋒表現緊張：「反映霆鋒內心有好多不安同掙扎，有好多矛盾！」日前被栢芝踢爆戴黑超為掩飾自己講大話的霆鋒，昨日除黑超以「真面目」示人，未知是否以行動反擊栢芝的言論。鄒凱詩對此剖析只有兩個原因：「如果仲咁在意對方講嘅說話，只有兩個原因，一係反映佢對女方講嘅說話不滿，一係就仲緊張女方講嘅嘢。」

據悉，霆鋒在這近五分鐘、約五百字的剖白全是自己心底話，並無搵智囊團幫手度稿。他言論間表現深情，談及跟栢芝現今關係時，他直言：「如果你現在問我謝霆鋒，你愛不愛那個人？想不想那個人？我跟你說我愛，我想。」他不希望小朋友在一個所謂破碎的家庭長大，令人覺得他們仍深愛着對方，揣測以為二人仍有復合機會。但據知情人士透露，霆鋒對栢芝已經死心，而且離婚主意已決，現正着手辦理離婚手續。

指天篤地 除了單手插袋，霆鋒亦不時手指指。	感觸掩嘴 說到傷感時，霆鋒即停口兼掩嘴。	低頭演講 霆鋒於約五分鐘的演講，經常低頭唔望觀眾。
霆鋒昨凌晨抵達北京機場時，戴上黑超以型仔look示人。	有消息指霆鋒現正辦理離婚手續。（資料圖片）

關係唔好 同居冇用

霆鋒在自白中兩次強調自己「不知道該如何繼續走下去」、又表示「我們未來就算是怎麼樣一個身份、關係，我們還是會很努力，去找一個健康安穩的空間，讓我們這對小孩長大」，言下之意，似表明他們各走各路的決心。至於為兒子着想，他們或會尋求「離婚但同居」來解決。鄒凱詩解釋若採用這個方法，他們要先搞好彼此關係：「好多離婚夫婦關係唔好，雙方有好多嬲怒，令大家關係混淆，佢哋應該令雙方關係和諧，再諗係咪一齊住，最重要唔好將小朋友夾喺中間當傳聲筒或磨心！」

鄧達智指霆鋒的造型求其。

臨床心理學家鄒凱詩認為霆鋒表現緊張。

文：專案組