鍾楚紅獨對法男零興趣
息影女星鍾楚紅前晚出席時裝騷時，大談對法國情有獨鍾，不過，法國猛男卻並非她那杯茶，紅姑更向記者說：「你哋唔好咁睇得起我！」
前晚紅姑、劉青雲、方大同、薛凱琪、Amanda S.、Ana R.等紅星名模雲集，出席法國時裝品牌agnes b.秋冬時裝匯演及派對。紅姑自爆向來鍾情法國事物，每年也會到當地一、兩次，每次逗留個多月之久，不過，她在法國就未有置業。
「唔好咁睇得起我」
紅姑說：「我好多朋友都喺法國有物業，我去嗰邊最鍾意買餸煮飯，當地嘅食物全部都係有機，好天然。（有冇打算出烹飪書？）諗緊。（最拿手煮乜？）睇下買到乜，我鍾意新鮮食材。」
法國男士以浪漫熱情見稱，不過紅姑對法國猛男似興趣不大：「喺法國太多嘢做，睇展覽、行街，冇需要諗呢方面。（鍾唔鍾意法國猛男？）冇試過鍾意。（佢哋有冇同你搭訕？）佢哋好欣賞女性，對個個女人都鍾意。（佢哋太熱情嚇怕咗你？）唔會對我好熱情，你哋唔好咁睇得起我。」
發哥上新戲要捧場
久未拍戲的紅姑，對好友周潤發主演的新戲《建黨偉業》即將上映，表示會捧場，又說：「我都鍾意睇劉青雲做戲。」前晚劉青雲亦在場，二人雖未曾合作過，他向紅姑大派高帽說：「佢有好多精彩演出，好似佢同發哥嘅《秋天的童話》真係冇得頂，如果佢哋再合作拍戲，我一定會睇。（恨同紅姑合作？）冇特別恨，係緣分。」此外，昨日青雲與太太郭藹明現身機場，問他到哪兒？他開玩笑說：「去街呀！」
文：名人組