薛凱琪早熟的眼淚
杜汶澤揀女有一手，睇佢揀老婆同揀女主角就知道，今次吹神茶敍請來杜汶澤，讓他揀選三位於影壇冒起的新進女主角作情深對話，第一集便是人靚聲甜的薛凱琪（Fiona），兩人交心對話，Fiona還被杜汶澤觸動心底最深處，令她一度泣不成聲，並自爆曾想過自毀，幸得神引導，才走出陰霾！
杜：杜汶澤 薛：薛凱琪
杜：Fiona你究竟係咪有集中困難症？
薛：我係好極端架，一係就集中唔到，一係就可以非常集中，好似拍緊一場戲或者畫緊畫、唱緊歌咁，就會好集中，出面發生咩事都影響唔到我。
杜：上一次同你拍戲，我發現你有呢個徵狀，你會一坐喺度，就開始諗第二樣嘢，到你要諗第二樣嘢嗰陣就會諗第三樣，直至導演嗌action，你又會成個人集中番晒，直至導演嗌cut，又會再諗過，其實我好想導演唔好嗌cut，咁你就可以一路正常落去。
薛：哈，咁你即係話我，action嘅時候先係正常啦？我唔係咁囉。
杜：你7年前點解會入行？
薛：我以前讀城大第三年嗰陣，有人叫我做模特兒，之後我發現用自己錢好爽，所以就keep住做，跟住又有人叫我去試音，咁就入咗行。
杜：哦，原來你係第一代o靚模！
薛：都唔係嘅，我舅父一路都喺娛圈做嘅，我本身好鍾意唱歌，但若果我叫舅父帶我入行，我擔心佢會覺得我係想做明星，所以我從來都無問佢，直至有人叫我試鏡，我先問舅父意見，佢就話如果我鍾意嘅話，做生不如做熟，咁我就加入咗華納，一做做咗七年。
自評演技未夠好
杜：你幾時開始發覺自己鍾意演戲？
薛：我第一部電影係《早熟》，我成日都好感激爾冬陞，我第一次接觸演戲係《學警雄心》，但hit劇唔hit人，我覺得自己做咗卅集，全部都做得好差！
杜：點叫做差呢？
薛：唔似真囉，總之差，如果有導演想搵電影女主角，點都會睇下我呢套劇，如果佢睇咗都嚟搵我，我真係要衷心講聲thank you！
杜：我諗佢無睇到，佢揀人好講直覺。
薛：好記得我第一次見爾冬陞，嗰時廿二、三歲左右，我着咗件男裝T恤、太陽帽，仲踢住對膠拖，後尾導演同我講番，見佢嘅人個個都好尊重佢，但偏偏我着成咁，心裏面喺度諗：「你咩料呀！」
杜：暫時嚟講你覺得邊套戲演得最好？
薛：《早熟》同《分手說愛你》我都好鍾意，睇番《早熟》，覺得當時嘅眼神好純真，拍嘅時候無嘢計算，喺人生中最特別嘅一部戲。
杜：兩部戲都係房祖名喎，王祖藍話你同佢拍《人間喜劇》要借位，但同房祖名拍咀戲就唔需要喎！
薛：咩呀，我同王祖藍絕無借位，佢當時個嘴仲有爆坼添。
與房祖名最合拍
杜：如果你依家就要死，你最想睇番自己嘅邊套戲呢？
薛：我想睇多次《早熟》。
杜：房祖名算唔算喺你拍戲以嚟，最合拍嘅男主角？
薛：都係架，始終我合作過嘅男主角都唔多，好似《摯愛》嘅郭品超，嗰時能夠溝通已經好好，因為我根本唔識聽國語，依家就OK。
杜：你近期經常返大陸拍劇，慣唔慣？
薛：有慣有唔慣，試過去好破舊、乜都無嘅地方度拍劇，連玩微博都要去某啲地方先上到網，要自己鈎線掛衫，啲衫有時又會畀蟲咬爛，間房又有蠍子……想食件炸雞，都要坐兩、三個鐘頭車！不過呢啲遭遇反而令我明白有時擁有太多嘢會唔開心，但當你乜都無，只要畀少少嘢你，都可以好開心。
全賴有「祢」
杜：我記得你拍《人間喜劇》嘅時候，曾經見你好唔開心，導演話你喺度醞釀情緒，係唔係呢？
薛：嗰排係我人生嘅最低點！
杜：我覺得你當時仲有少少抑鬱添，但又奇怪，你都發展得幾好，有咩唔順意呢？
薛：我講嘅唔係事業低潮，係成個人嘅最低點。我由細到大都唔習慣同人講心事，舉個例子失戀同死咗隻狗，都會令人唔開心，但好多人都覺得我事業好順，應該要開心，於是我啲唔開心累積到某日突然爆咗，嗰段時間（即拍攝《人間喜劇》時）好漫長，唔開心咗兩年幾。
杜：我以前都試過好唔開心，每朝瞓醒會問自己點解要醒。
薛：我好記得嗰陣曾經有場戲要喺電車路拍，當時有架電車喺旁邊條路軌駛過嚟，我心諗如果我瞓過去，架車一撞埋嚟，我就唔需要再down落去；但我又諗，我仲要拍戲、唱歌，有好多熱愛嘅嘢都放唔低，我唔可以放棄自己！
杜：你最後點跳過呢個難關？
薛：最主要係因為神。我嗰時連續好耐都瞓唔到、食唔到，體重狂跌十幾磅，之後我去上咗一啲課程，一半關於神，一半關於自我開解，人點解唔開心，係因為其他人，所以個課程教我要去祈禱，逐個人去原諒，原來最難原諒嘅人係我自己。
杜：會尋求神嘅協助，證明對生命仍有希望。咁依家有乜嘢會令你覺得最開心？
薛凱琪聽後，開始哭了起來，還愈哭愈厲害，要一些時間稍為平復之後，才能繼續說。
薛：（哭着說）每一件事！依家每一件事都會令我好開心，好似依家做完訪問，返到屋企見到媽媽都會好開心，只要經歷過最低潮，之後乜嘢都可以令你覺得開心，我之前去大陸拍劇，病到行唔到，拍到夜晚十一點即刻入醫院，驗完血劇組通知我，第二朝要開九點鐘……第二日我坐車去片場，喺車上面蓋住張被聽住音樂，我心入面多謝自己所擁有嘅，亦好開心見到沿途好靚嘅風景。
杜：當擁有好多嘢嘅時候，就會慢慢忘記其實原本只係要好少嘢，我以前交到租已好開心，因為當時我長期連交租都交唔到。
薛：以前嘅我，有好多嘢都會覺得好辛苦，但只要坐低諗一諗，其實我係幸運嘅一個，好似有咁好嘅電視劇搵我，錢又唔錯，有良心嘅話，唔應該去怨。一啲唔開心嘅經歷，係你人生一件好大嘅禮物。
杜：我有位好有錢嘅內地朋友，佢想移民香港所以投資一千萬買樓，我問佢點解，佢話特區護照去外地好方便，香港嘅教育醫療又比內地好。我活咗卅八年，估唔到本特區護照值成一千萬！每個人都有自己嘅快樂，只係我哋無去發掘啫！
採訪：影視組
場地：TABLE 18@觀塘apm
髮型：Jo Lam@Stage
化妝：Jessica Chan Makeup workshop