黃宗澤情侶檔順便見家長
胡杏兒與黃宗澤（Bosco）昨日情侶檔上陣搵銀，期間不時打情罵俏兼耍花槍，杏兒父母亦專程前來捧場，被取笑見未來女婿，Bosco對此笑不攏嘴，表示不便作答，杏兒只一味甜笑推翻。
胡杏兒、黃宗澤（Bosco）、鍾麗淇（Margaret）及何佩瑜（Jeana）昨日出席內地運動服品牌活動，杏兒與Bosco情侶檔自然成焦點，再加上杏兒雙親特別前來瞄未來女婿，令Bosco分外風騷。
期間杏兒坦承揀男友很挑剔，Bosco聞言即彈開幾步兼擰歪面笑，杏兒即望住男友甜笑謂：「你望嗰邊做乜啫？」即場打情罵俏。對於杏兒雙親被指來見未來女婿，杏兒笑住否認，Bosco則謂：「我不便作答！其實一齊出嚟預咗畀人玩，不過就唔知會唔會收貴啲！」
否認嘲JJ鄉音
談到杏兒與賈曉晨（JJ）合作新劇《樂府藏龍》時取笑對方有鄉音，杏兒大呼冤枉，表示只曾於試造型時與對方見過面，更謂：「都未開始拍對手戲，本身我覺得佢好靚，有得合作係開心事，但唔知點解有呢啲新聞。」有指Bosco曾與JJ傳緋聞，引來杏兒不滿，杏兒聞言即向Bosco撒嬌：「最衰都係你！」Bosco也立刻認衰，澄清與JJ未曾合作過，更賣口乖指與杏兒合作最舒服。
同鍾麗淇好傾
而產後首度現身的Margaret，老公乃杏兒前男友，不過兩女似未有芥蒂，Margaret於台上主動與杏兒握手寒暄，事後笑言兩人私下感情不俗，談到其5個月大女兒Isabella，Margaret即一臉慈母樣謂：「BB自己湊，所以好掛住佢，要趕返屋企，不過老公都有幫手湊，BB嘅中文名就未改，等佢大個啲先自己諗。」
文：影視組