鋒芝一家4分「午」裂

自「鋒芝婚變」驚爆後，被栢芝傷透心的霆鋒一直留在吉隆坡開工，就算念掛一對愛子Lucas和Quintus，兩天的休假亦寧在酒店自閉逃避返港；栢芝則在深圳跟韓星權相佑拍《影子愛人》，兩公婆異地相隔冇溝通冇聯絡，甚至一對兒子亦手足分離，有指大囝Lucas跟栢芝住在陽明山莊，栢芝每天從深圳趕返港陪囝囝；至於細囝Quintus則由嫲嫲狄波拉（拉姑）照顧。

今日乃端午節，平日總愛一家團聚過節的霆鋒，今年選擇留在吉隆坡開工，沒有跟劇組請假返港。回想今個農曆新年，鋒芝一家四口還溫馨到新加坡探嫲嫲度歲，昔日溫馨甜蜜的家庭聚會彷彿已成回憶。據知，近日在婚變危機中處於下風的栢芝，昨晚終趕工拍畢《影子愛人》，將於7月初才接拍新戲《河東獅吼2》，不過6月中她要跟導演馬偉豪返大陸試造型，此期間約有兩周空檔，有指栢芝會攜子飛吉隆坡作絕地反擊，懶理霆鋒「我唔會畀佢過嚟」的聖旨。有傳栢芝一直保持沉默，是希望事件盡快平息，讓她可秘密飛吉隆坡搵霆鋒箍煲。

有傾有講刨劇本

而佔盡上風的霆鋒昨午1時跟周杰倫現身吉隆坡鬧市一間藥房拍攝，穿上黑背心的他露出手臂紋身，趁未埋位時坐在藥房門口，在保鏢保護下，霆鋒邊煲煙邊讀劇本，還四周望環境，跟工作人員有傾有講，心情明顯不俗。

由於霆鋒的新聞熱炒，吸引逾200名市民圍觀，劇組要封街拍攝，有好奇市民在樓上觀望，亦有大批女粉絲坐茶檔睇偶像，甚至有街坊在對面街大叫：「張栢芝會唔會嚟？」幸好霆鋒時運高聽唔到。周董則穿了軍綠色衫，頸有紗布，手上亦有血漿，拿着藥袋的他走出藥房上車。

有傾有講	喪刨劇本	周杰倫（左）在片場認真投入拍攝。
由於圍觀者眾，片方惟有封街拍攝。	放大圖片

導演代否認玩命

對於有報道指霆鋒日前接獲栢芝預告會玩自殺的恐嚇短訊後，嬲到震的霆鋒剛巧要拍一場撞車戲，他即化悲憤為自殘，就算導演一take收貨，霆鋒亦主動要求重拍玩命，對此，導演林超賢接受本報訪問說：「邊場戲呀？冇印象喎，冇啲咁嘅事，我哋拍戲會有溝通，點會有啲咁嘅事發生，總之霆鋒好專業。（佢同你傾心事？）點都有一、兩句，但唔講嘞。」另亦有報道指栢芝抓撈中港台經理人，開出6,800萬簽5年條件卻有價冇市，本報致電其經理人求證，惟電話直飛留言信箱，至截稿前未聯絡上。