王祖藍教路醜男變索女
扮女人扮到出神入化的王祖藍昨日與莊思敏、狄易達、陳自瑤等為新節目招募活動擔任評判，參賽者技驚四座，現場笑聲不斷及尖叫，而祖藍則自嘲醜男扮女人才有說服力，莊思敏則因平胸高大曾被人誤當男仔。
王祖藍昨日於荃灣廣場出席《變身男女Chok Chok Chok》招募活動並擔任評判，扮女人有一手的他分享扮女人心得時竟自嘲是醜男︰「好似我哋呢啲醜男再變靚女就有說服力，扮靚女要有咁靚得咁靚，要靚過自己女朋友，如果靚過女朋友就真係好靚。」祖藍又表示與羅慧娟同是教友︰「睇新聞先知佢病，佢之前有嚟教會分享好樂觀。」
莊思敏被當男仔
同場的莊思敏以中性打扮現身，她自爆小時曾被人誤會是男仔︰「細個似男仔，短頭髮加上高大平胸把聲又沉，試過畀人認錯，以前都有同啲男女朋友反串打扮。」問可會叫男友吳浩康扮女人？她笑說︰「佢扮女人唔夠索喎，只可以扮肥妹。（你變做男仔好唔好？）唔好，自己性格把口唔收，做女仔有着數，又會得人鍾意。」
觀眾評判笑爆嘴
此外，昨日的招募活動吸引不少市民參加，但大部分參賽者裝扮及言行均十分「騎呢」，其中「醜版黃夏蕙」打扮驚人，即場唱Monica和扮祈福黨，又有「大隻版瑪麗蓮夢露」等參賽者，令現場觀眾及評判抱腹大笑。
文︰專案組