陳豪撩興觀眾賤得抵
陳豪與楊怡前晚結伴為Audi A6行政房車揭幕派對擔任嘉賓，雖然撞正兩人主演的劇集大結局，因劇中角色而被網友封為「賤男」的陳豪，認為觀眾睇得投入不失為好事。
陳豪、楊怡、李克勤及Janice Man（文詠珊）前晚亮相將軍澳邵氏影城《Audi A6行政房車揭幕派對》，四人與Audi A6一樣，成為全晚嘉賓們力邀影合照的對象。
陳豪對於因在劇集《點解阿Sir係阿Sir》中，欺騙鍾嘉欣感情而被封「賤男」，他說：「我從來未被人咁樣封過，拍戲都未試過『蝦』女仔，呢次將我好形象拖到好低，真係大吉利是！（嬲？）有好有唔好啦，觀眾睇得投入都情有可原，證明我哋努力冇白費，so far我出街都冇人嗌我做『賤男』，大家睇結局就知，唔只唔會向我掟雞蛋，話唔埋仲會送花畀我。」
楊怡同樣受害
而劇集結局則是陳豪離開兩女，遠走清遠教書，及後他與楊怡重遇。楊怡說：「觀眾真係睇得好投入，我都係受害者，都有人話我同嘉欣搶羅Sir，但睇埋結局觀眾會明。（唔怕嘉欣搶戲過你？）唔怕，我都戥佢角色慘，網友撐佢攞視后，我都撐呀！不過嘉欣上台攞獎記得多謝我哋，我哋要掹番形象。」
文：影視組