2AM企定唔郁碌木獻唱
韓國四人男子組合2AM昨午為節目錄影，吸引大批粉絲捧場，雖然四子唱慢歌時企定定猶如碌木，但已足夠令粉絲冧到暈。其後他們離開，為昨晚的演唱會作準備，在門外守候的粉絲更組「的士車隊」追星，認真癡纏。
前日抵港的2AM昨午到亞視錄影節目《ATV台慶勁唱會》，片段將於明晚的台慶晚會播出。約百五名粉絲早已到電視台排隊見偶像，當中更有穿校服的少女，他們苦等多個小時後終被安排入場。
收好多禮物
2AM四子趙權、瑟雍、昶旻及鎮雲以西裝型Look出場獻唱慢歌，期間「八隻腳」完全冇離開原地，雖然靜態表演，但深情歌聲足以冧暈fans。等候期間，隊長趙權看到身後大屏幕，即伸長雙手扮十字架轉圈，又輕輕跳幾下舞步，發揮搞笑細胞，令粉絲瘋狂尖叫。
已第二次來港的趙權表示很開心來港見粉絲，提到前日抵達香港機場時場面混亂，有否被粉絲嚇親？昶旻笑謂：「今次係第一次成隊一齊嚟，感覺好特別，香港嘅fans真係好熱情，比馬來西亞同印尼嘅仲犀利。（收咩禮物？）公仔、朱古力、靈芝。」
經理人擋駕
另外，提到韓國天王Rain亦已來港，問到會否怕風頭被搶？經理人即急急擋駕表示只答兩條問題，拒絕再答，場面非常尷尬，趙權只好說「Thank You」來打圓場。其後四子離開為昨晚的演唱會作準備，已在門外守候的粉絲組「的士車隊」追車，認真誇張。
文：影視組