陳寶珠娶新抱狂標開心淚
陳寶珠寶貝仔楊天經昨與拍拖三年的女友吳文珊註冊結婚，寶珠姐半百粉絲到場助興，並夾道歡迎一對新人，寶珠姐見證兒子簽字和讀誓詞時，更開心到喊。
36歲楊天經與38歲的圈外女友吳文珊，昨日以簡單禮服現身紅棉路註冊結婚，喜宴將延至明年才擺設。一對新人除有雙方家長見證註冊儀式外，不少親友亦有出席，包括寶珠妹妹陳寶儀和女兒羅苡之，更有半百寶珠迷夾道歡呼新人，天經亦大方與老婆咀嘴，表現甜蜜。
行禮緊張冇笑容
註冊期間雖未安排記者入內，但據知註冊官着新人起立時，寶珠姐緊張到彈起，要一眾親友叫她坐回座位。當天經宣讀誓詞時，寶珠亦不禁感動流下眼淚，場面溫馨感人。
禮成後新人到門外拍照留念，又齊齊咀寶珠姐。天經表示行禮時緊張到硬晒軚，故笑容欠奉：「驚讀錯誓詞。（生BB？）Auntie……唔係，係媽咪（岳母），佢都冇畀壓力，隨緣啦，可以慢慢嚟！」他表示婚後仍會和寶珠姐一齊住。被問到求婚過程，他說：「我哋拍拖三年，用咗一個月籌備，其實過程都好簡單，只係送戒指，冇跪地、冇送花，我哋講心！」
「我畀新抱滿分」
新娘子吳文珊昨日非常開心，又稱因太累，所以沒有因註冊而緊張到失眠，問到可有心理準備與奶奶相處？
她說：「其實奶奶好錫我，亦好易相處！」寶珠在旁補充說：「我畀新抱滿分，我做奶奶亦唔會擺起個款，珊珊都好尊重我，（唔捨得個仔所以喊？）點會，我仲多咗個女，但都唔知啲眼淚邊度出嚟，不過佢都大個啦！佢哋二人世界，我都好識做避開。」
至於送甚麼禮物給一對新人？寶珠姐說：「錶、金器……（有冇家傳之寶？）冇，我咪係寶囉！」寶儀稱羅樂林要開工，問到二人「分房瞓」？她說：「我哋相處OK，都咁多年，平淡是福。」文：影視組