莫少聰約舊愛酒店短聚解鬱結
因吸毒在內地被拘留十五天的莫少聰昨午在港舉行記者會，並一改早前被指輕佻的作風，三度鞠躬認錯，承諾日後不再接觸毒品，又否認早前收錢接受內地媒體訪問。事後阿聰與舊愛上山詩鈉敍舊，遊花園一輪，最終經落馬洲匆匆返回內地。
莫少聰因吸毒在內地被拘留十五天，昨午旋風式返港召開記招，親身交代一切。一身白西裝look的他由經理人張國忠陪同下現身，先自我發言，再由記者提問，態度嚴肅，期間更三度鞠躬，整個過程約十五分鐘。他主動提到被拘捕經過：「廿幾個人去頤和園遊覽，但我只識入面五、六個，期間有人遞咗個煙斗過嚟叫我吸，裏面係大麻，我推咗佢又再叫，最尾吸咗一啖，三日後就有公安去片場搵我。（覺唔覺得畀人設局？）事情已經發生咗，係我自己唔啱，唔想再追究。」談到同涉毒被捕的孫興，阿聰以普通話說：「我認識他，但大家平常沒有聯絡，我跟他是兩回事。」
否認收錢獨家受訪
至於獄中生活，阿聰表示並沒有想像般差：「我哋留喺度，係畀時間同方便有關方面調查，（生活）都幾人性化，佢哋會同我哋傾吓偈，話畀我哋聽有啲嘢真係唔碰得嘅。」阿聰發言期間一臉嚴肅，更自責謂：「其實一啖都唔應該，如果能夠再堅持，成件事就會唔同，呢次可以係年輕人嘅借鏡，總之我以後都唔會再掂，仲會做啲工作回饋社會，以及過濾吓身邊嘅朋友。」
談到被傳早前收款接受內地媒體獨家訪問，阿聰忙不迭澄清，張國忠則推測或許阿聰獲釋後一切安排較匆忙，加上只接受一間媒體訪問，故惹來誤會。早前有記者報稱被阿聰劇組工作人員毆打，張國忠謂曾向劇組了解，但暫未獲回覆，阿聰本身對事件亦不甚清楚。
懶理洪欣兒子被嘲
阿聰被問到舊愛洪欣表示兒子返學校後遭同學取笑一事，他謂：「我冇同佢聯絡，亦唔知佢生活狀況，所以呢個問題答唔到。」他又稱選擇在母親節返港是想順道與媽媽食飯，向對方派定心丸。雖然阿聰亦有在微博留言祝母親節快樂，然而，記者會完結後，他卻換上印有「You've got what I want」（你已得到我想要的）字句T恤，在酒店多逗留兩小時，相約舊愛上山詩鈉high tea。結帳離去時，阿聰登上座駕帶尾隨記者遊花園，由旺角再到大埔許願樹，最終經落馬洲過關離港。另外，孫興亦選擇今天站出來，於內地舉行記招交代一切。
文：影視組 攝：追蹤組