祖兒乜都唔見執番條命
容祖兒結束倫敦之旅返港，自爆曾遺失了兩張信用卡和手袋，幸好均失而復得，只是不見了一對耳環，她自嘲是大頭蝦，執番條命算好彩：「如果我個頭唔係黐住條頸，隨時唔見咗！」
祖兒昨日身穿白色飄逸裙子出席護膚品牌MIOGGI活動，親手為fans搽護膚品扮靚，擔任了4年代言人的祖兒，問皮膚是否愈來愈靚？她笑說：「日日化妝、瞓得唔好都冇差到，好感恩。」
曾失定情戒指
剛從倫敦做完騷返港的祖兒，自爆今次英國之旅瘀事連連：「自己好大頭蝦，如果我個頭唔係黐住條頸，隨時唔見咗，我兩度喺百貨公司唔見咗信用卡，手袋又留低喺餐廳嘅洗手間，好在全部搵得番，虛驚一場，最後只係唔見咗對耳環，去咗四、五日，執番條命都算好彩！」問有冇試過唔見定情信物？祖兒坦言：「都有試過唔見戒指，拍嘢時擺喺袋，之後搵唔番。」
想有世紀婚禮
此外，前晚祖兒出席「勁歌金曲優秀選第一回頒獎禮」，連奪金曲獎和「最受歡迎廣告歌曲」獎，祖兒謂本想留在英國睇王子大婚，可惜公司唔畀，她說：「不過我都去咗西敏寺影相，感受浪漫氣氛。」問將來結婚會唔會咁隆重？祖兒笑說：「如果嫁得出有幾鋪張就幾鋪張，滿足吓大家，但私下我就想完全冇人知，低調進行，40歲前嫁得出就想有世紀婚禮。」
另對於蔡一傑涉醉駕被捕，祖兒謂：「我會問候吓佢，希望佢冇事。（有冇同佢飲過酒？）慶功有飲少少囉！（見過佢爛醉？）冇，佢平時咁有儀態，好少失儀。」
採訪：音樂組