林峯四白金夠照攞獎無愧

林峯、容祖兒、Twins、梁漢文、鍾嘉欣、許志安及李治廷等，前晚現身將軍澳電視城，出席《勁歌金曲優秀選第一回》。

阿Sa恭喜前夫四次

林峯憑《讓我愛你一小時》獲「最受歡迎華語歌曲獎」，他對於外傳無綫為幫他挽人氣而「犧基保峯」之說表示：「冇聽過，唔好咁多揣測，我隻碟攞咗四白金o架！唔好將注意力轉移。」他續說：「我唔知，我忙開工冇睇新聞，總之我嘅工作有人注意，就係我唯一滿足。（見到基仔尷尬？）我真係一頭霧水，我哋同公司o架。（傳你年尾攞男歌手獎？）依家幾月呀？年中就講定年尾，年年講咪又年年冇，有份選我已開心。」

蔡卓妍（阿Sa）被問到前夫鄭中基被本報拍得拖大肚女友出巡時說：「係咩？我忙做嘢仲未有時間睇，恭喜佢哋，我係第四次恭喜佢啦！（會唔會送BB用品？）上次答咗，今次唔答，總之祝佢哋幸福快樂，BB健健康康。」

泳兒不讓師姐祖兒及Twins專美，憑《有誰來愛我》獲獎。

鍾舒漫近年已成音樂頒獎禮的常客。

梁漢文唔做和事老

梁漢文雖結婚多年，遲遲未做老竇，但他表示不介意被鄭中基爬頭，他說：「我都估唔到佢仲快過我做老竇，我未打畀佢，之前有SMS恭喜佢。（叫佢旺吓你，等你做老竇？）互相旺啦！我希望佢有咗呢個小朋友後生活得更開心。」

對於張衞健被胞弟張衞彝（Henry）力數，梁漢文說：「Dicky（張衞健）同Henry係親兄弟，我同Dicky就沙煲兄弟，雖然我同Henry都熟，但家家都有煩惱事，唔方便畀意見。（做和事老？）睇Dicky想點，不過外人幫手傾，會好尷尬。」

文：影視組