靚靚撐傑仔：佢有少少死狗
蔡一傑昨晨在薄扶林因交通意外涉醉駕被捕，原來前一晚傑仔跟伍詠薇、袁詠儀（靚靚）晚飯及把酒談心。靚靚力撐傑仔向來是「安全先生」，可能太攰才生意外，又表示對方已經知道錯。
傑仔「炒車」後因「吹波波」超標被捕，原來前一晚跟一眾好友晚飯，前晚9時多靚靚帶囝囝回家先離隊，傑仔則隨伍姑娘返貝沙灣住所把酒談心至天光。
靚靚昨得悉傑仔出事後，在電話中力撐好友：「睇到新聞好突然，傑仔一向揸車好小心，佢係『安全先生』，唔係爛醉嘅人，又唔係劈酒，只係把酒談心，一定飲得唔多，可能酒氣未散，有倦意令到判斷力有問題。」
好彩冇受傷
靚靚強調傑仔從不亂來，幸好今次意外沒受傷也沒傷人，算是不幸中之大幸：「得個教訓，以後無論飲多飲少都唔好揸車要搭公共交通公具！」之前多名藝人涉及醉駕都獲輕判，問她擔不擔心傑仔會被重判，靚靚說：「唔係朋友至咁講，佢真係好少咁，係初犯，向來駕駛紀錄都良好，同佢通過電話，佢有少少『死狗』，都知係自己錯，自己唔啱，畀佢休息下先啦。」
工作暫如常
而今晚傑仔原定要為無綫《華麗明星賽》錄影，監製陳旭亮表示未聯絡得上傑仔，暫定一切如常，不過仍會尊重傑仔的心情、狀態來作決定。
另外，曾與傑仔傳緋聞的好友張耀揚雖身在大陸，亦知傑仔的新聞，他說：「飲咗酒就唔好揸車，咁唔小心！係個教訓，我會問候佢亦會勸下佢。」至於二○○八年曾在蔡一智生日會被傑仔醉攬的好友梁烈唯坦言：「醉駕點都係唔啱，我相信佢唔係太醉，而係唔熟架新車嘅性能，以我所知佢好少飲到爛醉。」
文：影視組