鍾嘉欣緋聞負累撇峯突圍

娛樂圈有新聞總比沒新聞強，懶理是否負面報道﹗可能這是娛樂圈生存之道。但偏偏鍾嘉欣是少數反其道而行之人，她相信緋聞無助上位，只會徒添壓力，堅信實力才是王道，希望大家淡忘她和林峯的緋聞，更會以佘詩曼為目標，終有一天能成為視后。

入無綫以來，我拍過唔少劇集，要講代表作，我覺得係《溏心風暴》嘅「常在心」，因為外間反應最大亦最受歡迎。講真我初入行時，大部分角色都係演乖乖女，技巧好幼嫩，可能唔係演得好好，但我唔會後悔覺得自己演得唔好，反而幾鍾意自己嗰種真，係用真感情，好自然。但最遺憾係狀態影響發揮，好似拍《蒲松齡》時就因為身體唔好，失眠而影響到工作。如果畀我揀，我最想飾演一個女殺手，着住黑皮或者紅色貼身衫，好似Charlie Angle咁，應該幾好玩。

台前幕後的嘉欣都是乖乖女，不煙不酒不夜蒲。

幸獲前輩指導

其實我覺得自己好好彩，由入行到依家，合作嘅演員都畀到我好多啟發。除咗主要演員，我最想講係好多三、四、五線嘅演員都幫咗我好多，我會同佢哋傾偈，有時佢哋未必同我有對手戲，但會睇完電視再同我講番有咩可以改善。

喺女藝員之中，我最欣賞阿佘（佘詩曼），佢係一個好值得尊敬嘅女藝人，我以前喺加拿大已經睇佢拍嘅劇集，好鍾意佢做「祝君好」呢個角色。我會以佢為目標，當然希望可以攞到視后，但相信要用多幾年去磨練自己，阿佘都做咗好長時間先攞到，佢嘅演技真係好成熟。

《溏心風暴》是鍾嘉欣最喜愛的作品，但與林峯傳緋聞令她深感壓力。

鍾嘉欣希望有朝一日像佘詩曼般登上視后寶座。

佘詩曼

王喜的執着及凝聚力最為鍾嘉欣稱讚及佩服。

欣賞王喜態度

男藝人方面，我好欣賞阿喜（王喜），佢好勤力，對製作同成個團隊捉得好緊，呢個圈好需要呢類型嘅人，帶動團隊集中。王喜對我幫助好大，佢演技好厲害好細心，好清晰個畫面出來嘅感覺係點，由《珠光寶氣》到《冏探查過界》，佢畀到我唔同嘅睇法。佢對劇組各樣要求好高，咁係好事，佢都係想製作好，當然唔可以過分離譜或者唔合理，如果可以令成場戲好，點解唔可以改吓劇本，我好欣賞佢。

我自問係一個性格偏靜嘅人，做嘢就做嘢，唔鍾意應酬，亦唔識打關係，可能呢種性格喺呢行會蝕底少少。不過我以真心對人，相信只要努力就一定會有人睇到。

提到私生活，我向來比較低調，老實講，冇新聞反而樂得輕鬆自在，因為如果太多新聞自然有記者跟我，咁會壓力好大仲唔開心。我係寧願冇新聞都唔想有負面新聞嘅人，因為我唔想影響到家人。我要顧及家人，要保持乖乖女形象，但我只係做番自己，我唔鍾意夜蒲又唔吸煙、亦唔喜歡亂搞男女關係。總之對家人同朋友我盡量低調，可以保護得幾多就幾多。