如果末日到……法拉攬實愛人

日本發生9級大地震，引發海嘯及洩漏輻射，傷亡慘重，全球關注，而近日掀起的「盲搶鹽」、爭購日本奶粉及碘片等瘋狂搶購潮，可見人心惶惶，並觸發起世界末日論。如果世界真的是走到盡頭，沒有明天，陳法拉說會攬實所有自己愛嘅人，你又會做甚麼？

陳法拉：如果世界末日，同所有自己愛嘅人度過最後一刻，緊緊攬住佢哋；除此之外都想去南極睇企鵝！

陳嘉桓：末日到最想陪屋企人同埋攬住我啲狗仔，好似鐵達尼套戲咁，裏面有一幕有個公公同婆婆喺張床度攬住，一齊等隻船沉，又或者好似上帝最後的晚餐咁，一家人一齊食餐飯！

劉璇：如果世界末日，我最希望同爸爸媽媽一齊，因為我細細個為練體操而離開家鄉，唔係好多時間同佢哋一齊。仲有想去埃及金字塔探險，覺得呢個地方好神秘，一直都想去。

李玟：我希望同至愛及家人一齊，仲會捐晒啲錢出去，讓其他人有機會喺最後一刻做自己想做嘅事！

任葆琳：世界末日真係唔知好過知！淨係想同家人一齊，好似平日咁坐埋一齊食飯已經好開心，不過，我仲想生ＢＢ。

汪詩詩：發明一個可以停止世界末日嘅機器，咁就可以救到呢個世界，做英雄！又或者發明一架太空船，帶人去第二個世界！

汪圓圓：希望可以同最愛嘅人去世界各地旅遊，去啲未去過嘅地方，好似歐洲咁，男友同家人一齊去都OK！

莫文蔚：世界末日，我唔會周圍去，會同屋企人一齊食飯，開番支最靚兼唔捨得開嘅紅酒一齊歎吓。我會喺微博同有誤會嘅朋友、或者喜歡嘅人，講啲好想講嘅說話，一次過講晒，方便又快捷，唔使逐個打電話。

陳嘉容：因為爸爸媽媽分開咗，所以世界末日嘅話，我會逼佢哋同我一齊過，仲會同佢哋講，大家係好有緣分先可以做到親人！

傅明憲：末日嚟到，我咩都唔做，攬住啲狗同屋企人一齊度過。我會唸經為啲狗狗積福，就算我去唔到極樂世界，都想啲狗狗去到。

文：名人組