王宗堯潘源良球戲相惜
譚詠麟契仔王宗堯（Greg）在潘源良執導的新片《出軌的女人》中演男妓，即將開拍《出》片的潘Sir見Greg有演戲熱誠邀他「做鴨」：「做鴨唔一定要鴨眉鴨眼，夏文汐、吳家麗佢哋演嘅有錢女人唔會搵騎呢蘇，我知Greg識日文，所以搵佢做日本嚟、喺內地Club搵食嘅鴨。」Greg亦指潘Sir給演員很大自由發揮空間。
兩人同樣愛波如命，不時與明星足球隊較技，潘Sir說：「睇人踢波或做戲都可睇出性格，Greg踢波落力、會追波，做戲一樣咁有Heart！」Greg亦向導演大笠高帽指潘Sir在中場「派牌」，串連到成隊波，如在片場貫穿所有事一樣。