趙彤狂爆瘡拮針減壓
台灣女星趙彤（Yedda）近日冷手執個熱煎堆，頂替尹蓁晞（Yumi）接拍鄧特希新劇《親密損友》，Yedda卻因首演無知女生，搞到大感壓力狂爆瘡，日前要幫襯著名針灸中醫師求救！
霍啟剛前緋聞女友趙彤（Yedda）以往多數在內地電視台擔任主持人，最近她獲得亞視垂青邀請拍劇，將與趙碩之、高皓正等合作。雖然有指此角色原本是o靚模尹蓁晞（Yumi）所演，由於Yumi終日「瘟仔」被公司雪藏，Yedda亦不介意「執二攤」。不過，她在劇中飾演無知兼有公主病的女生，與她「有腦」個性背道而馳，為此她大傷腦筋徹夜不眠鑽研角色，結果近日壓力爆煲，頸上狂爆壓力瘡。
苦練空洞眼神
Yedda為免影響拍攝進度，日前趁空閒時間到銅鑼灣向著名針灸中醫師求救，她還大方地讓本報直擊針灸過程。她坦言過程雖然感到少許痛楚，但相信中醫師的專業，問到是否真的拍攝壓力大，她說：「都真係幾大壓力，我成日都諗點樣做得好啲，因為個角色要扮無知，我唔係好識扮，導演叫我要眼神空洞啲，講嘢要好似咩都唔明咁，我依家好努力咁學，希望快啲可以上手。」
擁有33D豐滿身材的Yedda，在劇中更要大騷身材，問到她可會介意？她說：「都唔會，都明白角色需要，電視尺度都唔會太激，所以唔擔心，（霍啟剛有冇話睇你演出？）冇呀，呢排冇同佢聯絡，如果遲啲套劇出街都會叫佢支持吓。」
文、攝：專案組