G.E.M.任叫任食填巨胃
樂壇小巨肺鄧紫棋（G.E.M.）將於五月舉行處女紅館演唱會，本應要積極減肥的她卻放肆狂食，連為代言時裝品牌的宣傳相，都一於照食可也，九秒九「毀滅」雞翼、春卷及「唔走甜」草莓梳打！G.E.M.何止巨肺？仲好大胃吓！
G.E.M.再任潮流品牌SKECHERS的代言人，日前在銅鑼灣餐廳拍攝宣傳照，得知現場可「任叫任食」的她，即寓工作於娛樂，分別「柯打」了蜜糖雞翼、春卷、蒜香雞軟骨、炸香蕉、蒜香Wasabi牛柳粒及「唔使走甜」的草莓梳打醫肚，相當好胃口。
食完雞翼未夠喉
邊食邊接受訪問的她，問到可擔心變「肥G.E.M.」時，成口油的她說：「唔怕！蜜糖唔係好肥，（吓？）雞肉係白肉嚟架嘛，（梳打好肥喎？）唔肥，好好食呀！」結果一口氣食清七隻雞翼及灌了四分一杯草莓梳打，才肯暫時停口，面露滿足之表情，不過其後又為沒有機會食蒜香Wasabi牛柳粒，而表現得有點失望。
發育少女怕餓親
問G.E.M.可會為五月的演唱會而節食？她大大聲說：「唔會，節食唔健康架！有做運動咪得囉，我都係想啲肌肉實啲啫，我依家手臂都有老鼠仔架。」有謂不少歌手為開演唱會而修身，更瘋狂至戒食飯？G.E.M.一臉愕然的說：「吓？邊個唔食飯呀？我唔得架，一定要每日起碼食一碗飯，我唔食嘢會死架，況且我年紀仲細，只得19歲，發緊育，點可以唔食嘢呀？」
G.E.M.坦言最肥時，曾試過節食減肥，可惜卻弄壞了身體，足足病了一個月，所以G.E.M.堅持：「減肥都要食嘢架。」
採訪：音樂組 攝：劉智源