陳嘉容dry足4年搵人爭被冚
名模陳嘉容（Eunis）與時裝密不可分，天橋足迹遍布香港、英倫、歐美等地，近年「升呢」為時裝專家，評衫以一針見血著稱的她自爆慘遭蕭亞軒粉絲狂插，但她仍堅持敢言作風，狠批港女抄襲成性。單身四年，Eunis坦言對愛情仍有憧憬，想搵個伴。
被追少過4次
Eunis於05年與前夫郭子輝秘密註冊結婚，男方後因藏毒激嬲Eunis，再傳男方另結新歡，兩人最終於07年6月分居。單身近4年的Eunis，雖然享受一個人的生活，但仍想找個有安全感的伴侶。
「我都結過啦！對我嚟講係一張紙，唔急，之前同居咁耐都係財政獨立。依家冇人同我爭廁所、爭被，獨立到唔知接唔接受到鼻鼾，但係病咗都想有人照顧。隨緣啦！或者遇到個人，我可以接受佢嘅鼻鼾。我對愛情仲有憧憬，想搵個伴，理想男士係要幽默，圈外人同有穩定收入，咁樣有安全感啲，你知呢行有嘢做先有錢。
面子攸關拒主動
不嬲都有男士圍住，哈哈，講笑。我異性緣麻麻，被追少過4次，可能呢行畀人感覺高傲，我又唔會追男仔，女追男隔張紙，但面子方面接受唔到，我知依家咩年代，但我內心保守，十幾歲就可能玩呢啲。有個年紀細過我嘅，成日約我食飯，我覺得朋友都會咁啦，唔會諗多，女性朋友比我敏感就話：『傻婆！佢追緊你呀！』我冇feel，驚咗，怕佢誤會落去，冇聽佢電話，我諗佢好hurt，依家都唔係朋友。深閨都係因素，我貪靚，唔鍾意夜。」
批判招痛罵
Eunis早前主持電視台潮流節目，品評藝人衣着，卻被網友在微博狂罵，無辜當災的她本着「為你着想，評衫不留人」的宗旨，未有收斂言詞，堅持有讚有彈。
「我講嘢一針見血，有人喺微博上為咗偶像而寫嘢鬧我，嗰次我講蕭亞軒着某套衫有啲怪，我哋香港人會覺得娘，佢fans就話佢係台灣嘅fashion icon，叫我唔好唔睇佢平時嘅style就評佢，我有唔開心，想回應話只係個人意見，不過唔想挑戰佢，覺得算喇，最後冇寫到，之後我見蕭亞軒着晚裝靚都有讚，但都多謝個fans留意我。」
無暇非藉口
Eunis可謂「見過鬼都唔怕黑」，曾被罵的她照舊「理直氣壯」，指出港女愛抄襲的穿衣通病，搬出個人事例，警惕時下女性要大膽地展現風範。
「香港女仔着衫成日抄襲，冇自己style，唔似日本同歐洲女仔風格，甚至連妝都唔化，accessories又唔戴，太普通平凡，平凡係靚，但太平凡就唔好，又唔大膽試顏色。我以前鍾意着黑白灰藍，仲好鍾意着褲，畀阿媽話，叫我畀番呢個年紀應有嘅風範出嚟，年紀大咗反而鍾意sharp color，好似返老還童。
香港女仔可以睇多啲外國時裝，我最留意巴黎時裝，第二就係日本，倫敦嘅都會睇，外國人有先天條件，腰短腳長着衫好睇，而且天氣乾燥，金色頭髮亂咗都唔會怪，香港天氣潮濕搞到頭髮塌晒，所以更加要整理，冇時間唔係藉口。」
時裝專家 指點迷津
要時裝專家Eunis挑選來季必hit服裝，實在適合不過，她眉飛色舞地說：「興Pastel Color（粉彩色）同Pattern，Christian Dior嘅紫色好吸引，好鍾意佢嘅Lace，Coach同Diane von Furstenberg嘅Pattern都好靚，Roberto Cavalli型得嚟夠性感。」雖然鍾情Christian Dior的Lace，但理智的她或只買一件日夜皆宜的Cropped Jacket（短身外套）。
Eunis口中的潮牌價格動輒過萬，但其名模之選卻是切合大眾的平民潮牌：「我會揀H&M嘅Conscious系列，呢個系列好環保，佢所用嘅物料係循環再用，而且係大熱嘅Pastel Color，最重要係價錢方面afford得起。」
採訪：專案組
攝影：李柏儒
服裝：BCBG