古天樂攀4000呎雪山驚爆肺
古天樂腳患未好，開工時頂硬上於中環跑街，更冒着全球飽受天災陰影下，日內出發前往雲南海拔四千多呎的雪山，在地震及爆肺的陰霾下開工，真認搵命博！
古仔昨一身銀髮Look，於中環鬧市與吳彥祖（Daniel）為麥兆輝及莊文強執導的《竊聽風雲2》開工，拍攝Daniel放置炸彈後，兩型男你追我逐的重頭戲，吸引大批途人圍觀。據悉，二人早於上星期已在該處拍戲，但因途人見偶像發出叫囂聲，被迫腰斬改於昨日補拍。而昨早劇組趁清晨時分人少，先拍攝爆破及古仔喪跑的場面，由於腳傷關係，古仔完成戲份後坦言感到腳痛。
至於日內往南雲拍攝杜琪峯新片，古仔直言擔心人身安全：「完全唔驚就呃你嘅，唔好話當地再地震，我仲要一口氣上到去四千幾呎雪山，最擔心係肺部負荷唔到，但冇理由因為咁唔去，況且劇組都驚我如果再唔去，雪山會開始融雪。」
讚日本人處變不驚
古仔不用埋位時躲在保母車內追看新聞直播，及翻閱本報。談到日本地震，他有感而發表示﹕「都係嗰句珍惜眼前人！我試過喺日本公幹，食食吓飯感到搖晃，知道係地震想搵地方匿，點知望吓其他日本食客，佢哋竟然冇反應！」他更欣賞日本人在「逃命」時仍自發性地守秩序，十分難得。至於Daniel在完成昨天戲份後煞科，今天緊接出發往北京，為新片《王的盛宴》開工，忙得喘不過氣。
文﹕影視組