擁有日本血統的前歌手裕美昨日出席婚紗活動，卻心繫居於日本但失散多年的父親的安全，她說：「睇到地震消息，我第一時間打去日本畀爹哋，但搵唔到，其實之前寄過好多嘢過去都被彈回頭，佢應該搬咗，我唔知佢搬咗去邊，已經失晒聯絡，好希望佢冇事。」
裕美續說：「我嫲嫲都住喺日本，當年我讀小學，父母離婚，嗰時嫲嫲已經92歲，我諗佢未必仲在生。之前有人提議我去日本領事館，託佢哋幫手搵爹哋下落，但我覺得咁樣好似通緝咁，所以冇做，我會為日本祈禱，希望佢哋冇事。」
