Baby着鞋瞓隨時逃命

Angelababy昨午三時抵港，戴上太陽眼鏡的她一身黑色打扮，似在哀悼日本地震的死難者，提到此行Baby猶有餘悸地說：「今次去日本做嘢，一返到屋企就地震，好驚，企都企唔穩。我住喺四樓，同事拉我落樓，喺街度見到啲電線好似頭髮咁喺天上飛，到冇咁震就上返樓攞嘢。街上好多人，電話又打唔通，好彩3G上到微博，網友話日本大地震。有兩個同事陪我由屋企去咗酒店，夜晚都瞓唔到，電視有好多火災同海嘯嘅新聞，好似災難片咁。」

捱餅乾 諗起死亡

由於打不通電話，最終是經理人Kim打往日本公司才找到Baby，所以Baby託Kim向其母報平安。問Baby可有通知黃曉明？她說：「啱啱先返到，冇機會打電話，陣間會同大家聯絡。尋日我都係靠食朱古力同餅乾。」

從新聞上Baby看到海嘯將大地吞噬，令她感到十分恐怖：「我瞓覺都唔敢除鞋，攬實個袋，聽到滋滋聲。上天畀我經歷呢一次或者有佢嘅理由，令我更珍惜生命，今次地震仲諗自己會唔會死喺日本？！（對日本留有陰影？）唔係第一次喺日本遇到地震，但咁大就第一次。（最掛住邊個？）屋企人。」

返家後Baby仍十分關注日本地震的災情，在微博呼籲大家為日本及雲南的災民祈禱。Baby前晚在日本返抵寓所後，為紓緩氣氛在微博寫上：「哈哈，對不起，搞笑一下，現在坐在梳化上，不時有餘震，感覺有點像在按摩椅上……」但搞笑言論遭到網友指罵：「地震關係到人命，你居然仲可以『哈哈』搞笑？」Baby隨即刪除微博。

另外，日本地震發生時也身在當地的彭浩翔，昨日亦已安全飛抵北京，他在微博中表示地震發生當晚感到不停的餘震，他更要開燈睡，食物、水和衣服都放在床頭，隨時逃命。

Baby回港，經理人Kim往接機。

Baby終於平安返抵香港。

文：名人組