蘇永康被誤認梁漢文瘀爆離場

在樂壇打滾多年的蘇永康,前晚為無綫遊戲節目《華麗明星賽》擔任嘉賓時竟被Star Ladies張慧雯認錯是梁漢文,令他被一眾兄弟瘀爆,十分無癮掉頭走,而國際中華小姐出身的張慧雯則尷尬到想喊。

張衞健、蘇永康、許志安和梁漢文BIG FOUR四子,前晚應草蜢邀請為遊戲節目《華麗明星賽》擔任嘉賓。四子悉心打扮亮相切合節目華麗主題,但穿上男裝高踭鞋亮相的蘇永康卻與蔡一智撞鞋,蘇永康又被取笑穿了女友的高踭鞋。

梁漢文笑到踎地

蘇永康拿着權杖catwalk出場大擺甫士,張衞健也不執輸,找來道具木方整蠱作怪明寸蘇永康。張衞健又對披着皮草的蔡一傑說:「我唔記得帶條毛添,我有成執毛o架,係個頭冇啫。」蔡一傑其後擁抱迎接許志安及作狀錫嘴,令觀眾大為嘩然。

節目中安排了Star Ladies協助嘉賓比賽,張衞健見靚女即大灑鹽花:「拿拿臨一人Mark一件上房喇!」其後四子反過來要Star Ladies「揀仔」,「賣淨蔗」的蘇永康對Star Ladies張慧雯說:「你好有善心肯揀我。」沒料到這位應屆國際中華小姐季軍竟認錯人,她對蘇永康說:「我唔係善心,你叫梁漢文,我叫張慧雯,我覺得大家有緣分囉。」此言一出即時引來哄堂爆笑,蘇永康被其他三子嘲諷:「講咗成晚原來以為蘇永康係梁漢文。」令一臉尷尬的蘇永康馬上掉頭走,而梁漢文則笑到踎在地上。

張衞健明寸TVB

擺了大烏龍的張慧雯則一時急到眼濕濕,幾乎淚灑當場。四子及後試食名貴鮑魚,張衞健竟倒TVB米說:「TVB咁孤寒o架,又話啲鮑魚番梘咁大舊,一粒粒嘅。」此外,草蜢接受訪問時,對於節目首集收視理想,他們同聲說:「咁要還神喇。」

採訪:影視組