靚靚慶幸屋企嗰件信得過
向來低調的李澤楷昨發聲明，交代了跟Isabella的感情關係，不少藝人都對兩人分手，大感可惜！
前晚出席春夏時裝騷的袁詠儀（靚靚），提到梁洛施與李澤楷分手，未曾與梁洛施合作過的靚靚說：「其實由佢哋拍拖、生仔到分手都好愕然。總之小朋友係大前提，解決咗就OK。（會唔會覺得男人信唔過﹖）信唔信得過我唔知，我屋企嗰件信得過咪得，佢有咩事死梗。」
謝天華：呢啲咪有錢人煩惱，有感情一齊又話為錢，分手就話有分手費，即使唔係，外界都會係咁講，一家唔知一家事，有啲可惜。
黃宗澤：大家畀啲私人空間人哋啦，家家有本難唸的經，私人事唔發表意見，知道佢哋分手都好驚訝，又啱啱生咗BB，好可惜，兩個幾有夫妻相。
周秀娜：有留意佢哋分手報道，都幾慘，呢件應該係兩個人嘅事，依家變咗七百萬人嘅事，希望BB健康成長，唔好影響到佢哋嘅生活。