張達明鬼馬踩場大小通殺
張達明以往多次扮鬼扮馬現身鬧市做宣傳，繼早前以惡霸造型到維園收陀地後，日前又去海洋公園踩場，扮遊客混入人群中排隊，不少市民發現他後都爭相拍照，有小朋友更大讚他靚仔，場面惹笑！
為宣傳三月演出的棟篤笑，張達明又在鬧市出巡搞破壞，過往扮過特首派糖、扮惡霸買奶粉，日前直踩到海洋公園扮遊客在門口排隊，更邊排隊邊擺出奇怪動作搞搞震，成功吸引市民圍觀，為排到發呆的市民帶來歡樂！不少市民爭相跟他合照，部分排 隊人士更向他「投訴」排得耐，他即講笑話逗他們開心，大人細路都成功被他冧掂！
玩足個半鐘
張達明又不停捉着小朋友問：「我靚仔啲定你靚仔啲？」有小朋友「識趣」讚他靚仔，亦有小朋友被他嚇到走夾唔抖。其後，他又跟幾個小朋友鬥跳得高，十足十大細路，玩了近個半小時，他終公告踩場成功，乖乖離開。事後，張達明表示看完海洋公園客滿報道後決定踩場：「估唔到啲人想去海洋公園連飛都買唔到！不過唔緊要，可以留埋啲錢買飛睇我個騷！」
求得上上籤
至於農曆新年期間，張達明因為要籌備棟篤笑無暇拜年，不過亦有抽空到車公廟求籤，更求得全廟唯一一支上上籤！他說：「畀籤我個住持仲話得一支上上籤都畀我求到，出年搵我代香港求好過，我話呢支籤就當係我幫香港人求架喇！」
文：專案組 攝：黃叔榮