廖祉甯傻更更亂噏當幽默
廖祉甯（Barbie姐）一向形象予人「寸寸貢」，又或是金句一籮籮。早前Barbie姐接受專訪時為金句解畫，她自言是一個有理想及幽默感的人，只是不懂表達，才令人以為她無厘頭。
Barbie姐日前穿上泳裝接受訪問，雖然當日天氣頗為寒冷，但她依然穿上三點式拍照。就算地下很髒，她亦毫無怨言跪地擺甫士，沒有半點埋怨，工作之認真，與她早前的「寸嘴」判若兩人。
驚失控搣大髀
Barbie姐表示：「娛圈係娛樂大眾嘅地方，好多事我都想以幽默一啲嘅方式去講、去回應。好似我參選亞姐嘅時候，記者見到我大腿有啲瘀痕，其實係我嗰時面對好多壓力，有啲嘢令我覺得好唔公平，令我覺得好難受，但我又唔可以講出嚟，只好自己喺枱底搣大髀嚟控制自己情緒，等自己唔好衝動。但呢個事實，喺當時根本冇可能講出嚟，惟有諗啲自己以為好幽默嘅答案答咗佢，點知出嚟嘅效果，只有自己覺得幽默，其他人覺得無厘頭，呢樣嘢我會好好檢討。」
夢想搞棟篤笑
最近簽了新經理人的Barbie姐希望在娛圈發展，問到有甚麼目標？她謂：「我知呢個目標離我好遠好遠，但我覺得人總要設一啲好遠嘅目標先會有進步。我入娛樂圈嘅目標，就係想舉行一場萬人空巷嘅棟篤笑，因為我好想將開心帶畀觀眾，我一向好鍾意許冠文同黃子華，若果有機會同佢哋合作，真係好開心，我睇過佢哋好多作品。」
文：影視組 攝：黎志輝 泳裝：Roxy