蒙嘉慧鄭嘉穎融冰談情
蒙嘉慧（YoYo）與鄭嘉穎最近合作無綫新劇，這對老拍檔竟然至今才打破隔膜，還熟落到成為知心友，彼此交換對愛情的睇法，YoYo更自爆她與男友鄭伊健之間一個「幾可愛的體驗」。
YoYo不諱言雖與鄭嘉穎在《爭分奪秒》及《與敵同行》合作過，但直到最近的《Only You只有您》才真正認識對方。
YoYo說：「可能佢被動，我又被動，大家之間好似有道牆咁，直到呢齣先至冇晒隔膜，如果唔係同劇田蕊妮幫我哋行前一步，我哋未必拆得走道牆，但其實我同嘉穎係同一類人，佢份人好直，有乜都攤開嚟講，心腸唔壞，亦唔愛造新聞，所以呢個劇幫到我哋了解，我好開心。」
享受相處過程
除了對手稱心，YoYo更對劇本萬分滿意，她說：「我喺劇入面做嫁唔出港女，劇本有好多touching位，例如『我哋需要婚姻而唔係婚禮』就值得反思，我以前都好似劇中所講冇安全感，會問男友有乜計劃，後來先發現男人即使有計劃都唔鍾意講。（伊健有計劃？）其實過程先係最重要，入唔入教堂冇意思，我最希望身體健康，新年時我又嘔又發燒，唔想初一入醫院，惟有死頂，點知佢（伊健）竟然話『打Kinect出身汗好啲喎』，以前嘅我就會諗『佢係咪唔鍾意我？』依家會識欣賞呢個都算係幾可愛嘅體驗。」
期望結婚生仔
相比YoYo的愛的體驗，鄭嘉穎則仍在尋尋覓覓，他說：「我已經到咗四十歲，阿媽都放棄再逼我結婚，我唯一想生番個小朋友，但到依家都未遇到合適對象，我唔係要分圈內、圈外，但求適合就得，我呢個年紀拍拖就希望結婚、生仔，想一次就白頭偕老，同唔適合嘅喺埋一齊咪盞搞！」
文：影視組 攝：謝國華
服裝：I.T（蒙嘉慧）