張家輝《綫人》稱帝破戒開飯

第一屆「粵港澳青年電影盛典」將於今日在廣州中山紀念堂舉行，據知，「最受粵港澳青年歡迎的優秀男主角」之爭，《綫人》張家輝揮低姜文、葛優、甄子丹以及任達華，勇奪影帝寶座。家輝昨得知喜訊表示：「好開心，係我拍《綫人》第一個獎，我都唔知會攞獎，多謝通知，公司叫我預時間出席，我覺得有提名都已經好光榮，唔需要公司講，都會抽時間去，呢個獎係對《綫人》一個肯定。（會唔會令你對嚟緊四月嘅金像獎信心大咗？）冇諗咁多，如果真係，都係一個肯定，但唔知點解，我只係攞咗一屆金像影帝，但個個都覺得我攞咗三屆咁，上年嗰屆係任達華。」

黃曉明膺「最高人氣」

正為新戲節食苦練鋼條身形的家輝，近期閉關在家，謝絕了眾朋友的飯局，以免被美食影響，但得知喜訊後，竟然笑言要主動搵朋友請食飯。張家輝還希望第一時間跟導演林超賢分享喜悅，但因對方去了睇景，未能即時聯絡得上。

而其他獎項，「優秀女主角」為《唐山大地震》的徐帆，男配角獎由《趙氏孤兒》黃曉明奪得，黃曉明亦憑該片奪得「最高人氣男演員」，「女配角」獎項則由《非誠勿擾2》的姚晨奪得。

文：影視組