宗澤杏兒鬧市拍拖 關係衫級跳
黃宗澤（Bosco）與胡杏兒的緋聞傳足近六年，二人雖未曾公開承認戀情，但前晚他們高調到「人山人海」的銅鑼灣拍拖揀新裝，杏兒更全程含情脈脈做其跟得女友，不時向男友眉目傳情，擺明想公開戀情。
Bosco與杏兒自○五年拍劇撻着後，感情愈來愈穩定，二人不時以情侶檔上陣搵真銀，就算去年傳出二人分手，但最終仍是翻撻成功。早前他們還雙雙北上拍攝新劇，於劇中飾演情侶的Bosco及杏兒更是攞正牌假戲真做，朝夕相對下感情有增無減。
低頭遮掩素顏
愛得癡纏的二人近日回港後仍是形影不離，二人前晚約八時便雙雙現身銅鑼灣鬧市拍拖，完全不介意戀情浮面，順勢力谷杏兒正在播映的劇集。明顯一身悉心打扮的Bosco，戴上帽子及黑框眼鏡，反而杏兒素顏上陣，打扮隨意。二人於一名女伴陪同下先往該處的I.T掃貨，期間他們有傾有講。
Bosco揀選新裝時，女友不時在旁給予意見。其後杏兒試鞋，更與男友有商有量。二人最終於店內逗留約半小時，Bosco已掃下大袋戰利品，反而女友未有斬獲兩手空空。當二人步出門口時發現記者在場，杏兒即低頭遮掩素顏真面目，又躲於男友身後做跟得女友，反觀Bosco則笑笑口。當他們等過馬路時，雖然女友人站於中間做電燈膽，但見Bosco仍忍不住與女友眉目傳情，杏兒更是含情脈脈甜甜笑。期間Bosco不忘叮囑於馬路上拍照的記者小心睇車。
他們之後轉戰附近另一潮店繼續購物，未幾已見杏兒購得大袋心頭好，她離開時還與記者揮手道別。Bosco亦向記者表示：「我哋都走架喇！」之後乘的士走人。
交流服裝心得
本報昨日聯絡Bosco，提到與杏兒拍拖掃貨，他說：「係一齊去買衫，仲有個形象指導添，因為我之後有好多宣傳要做，會上草蜢個節目做嘉賓外，又要宣傳新劇同上《勁歌》，加上我之前幾個月喺大陸拍劇，咪專登去買衫換季囉。（同杏兒情侶檔做草蜢嘉賓？）唔係，其實大家喺服裝上一向都會互相交流意見，朋友幫下眼嘛，咪約埋一齊去囉。」當Bosco被追問是否想乘機公開戀情時，他即笑笑口謂：「唔係，唔係。」
文、攝：追蹤組