周柏豪自掏腰包享齊人福
周柏豪日前自掏腰包請公司藝人楊愛瑾、連詩雅及董敏莉食新年飯，四人為攞好意頭齊齊炮製「八方撈起」，寓意各人在兔年「長撈長有」，柏豪更獲三女餵食肉絲，可謂艷福無邊﹗
周柏豪近年人氣急升，獲不少大品牌力邀做代言人及出席活動，可謂賺到盆滿缽滿，更憑歌曲《乞丐王子》勇奪「叱咤十大」，柏豪日前豪擲五位數包下一間飽覽無敵海景的房間，並邀請同公司的楊愛瑾（Miki）、連詩雅及董敏莉邊欣賞維港邊歎美食，各人更親自下廚炮製名菜，最後由「老闆」柏豪主持大局齊齊「撈起」，八隻筷子在盤中「亂兜」，還大叫說：「撈起、撈起，齊齊撈起。」
不避嫌互餵
而銀幕情侶的柏豪及Miki不避嫌互餵，影大合照時女方更主動依在柏豪膊頭上，記者取笑兩人不要再「做戲」，抵死的Miki即說：「咩呀？佢直頭係我男友啦。」問到連詩雅及董敏莉是否相信兩人拍拖？兩女笑笑口說：「信，我哋知係真。」令全場人捧腹大笑，之後柏豪「玩嘢」謂：「我講真又冇人信。」
Miki工作至上
四人異口同聲表示希望兔年順順利利及身體健康，問到想不想搵到真命天子？緋聞纏身的柏豪說：「想o架，不過冇時間。」Miki則說：「隨緣啦，唔係要就有，依家工作為上，感情遲啲先諗。」
採訪：音樂組
攝影：黎志輝
場地：阿一海景飯店