莊思敏 林莉 徐靖雯 2011蓄勢待發
2010 twenty-ten轉眼已逝，一年終結一年又始，緊接着的2011年會是怎樣的一年呢？本報特別找來莊思敏、林莉和徐靖雯三位去年突圍而出的模特兒來砌出2011字樣，盼望新一年比往年來得更精彩、更豐盛！
一向身材平平的莊思敏，去年忽然勇敢隆胸，還大方承認加割雙眼皮，勇氣可嘉頓成為爆紅人物，其敢作敢為的性格令人激賞。問到今年可有更突破的事想做？她笑說：「舊年都算做咗個創舉，所以今年應該唔會突破得過舊年，自己反而想喺電影方面有多啲嘗試，想拍多啲戲，（隆咗胸拍性感角色？）唔介意但唔會係主力，有好多瘋狂嘅角色都想試吓演，例如打女或者精神病人咁啦，總之有別於平日嘅自己啦！」一直與男友吳浩康感情穩定的她，被問到會否2011年拉埋天窗？她笑說：「暫時未有計劃，如果有一定通知大家，我唔會隱瞞，大家都知我性格！」
遇啱即閃婚
至於港姐出身的林莉（Carrie），去年挾着「翻版林志玲」的稱號成功闖入模界，更被指獲富豪垂青，開設模特兒公司誓捧她成為「香港第一名模」。林莉自言從小性格內向怕羞，當模特兒令她改變不少，她說：「我屋企人思想好傳統保守，所以我都被影響得好深遠，但做model令我變得外向，好似舊年nude住影嗰輯人體繪畫相我自己就好滿意，好多人都問呢個係咪底線？其實我冇一個特定嘅底線，做得呢行就會做到最好。」新一年林莉表示希望可多作其他方面的嘗試，更有意在外地住上數個月體驗生活，反而感情事就隨遇而安，她說：「我唔會特別追求，但一遇啱閃電結婚都唔奇。」
高過鄭嘉穎
而因與鄭嘉穎傳緋聞而為人所知的模特兒徐靖雯（Jenny），表示新一年希望能進軍娛樂圈，一嘗拍戲滋味。問她想要和嘉穎合作嗎？怎料她竟笑說：「我諗我未必可以配佢，因為我比佢高！」Jenny說她來港發展朋友不多，刻下最想就是在香港找到男朋友：「我好想搵個男朋友，咁我就唔會孤單，（擇偶條件？）其實我覺得外表唔重要，靚唔靚仔真係冇所謂，最緊要係有責任心同上進心。」三個美女三個夢，2011年大家又有甚麼想做敢做要做的呢？
採訪：Ada Lam
攝影：沈建程
化妝：Stephen Lau（林莉）
info@michelle-beauty.com（莊思敏）
Katherine Pang@make up for ever academy（徐靖雯）
髮型：POP Hair Dressing（林莉）
服裝：Miss Sixty Kate Spade Liu Jo DIANE von FURSTENBERG
場地：Xenter Jut&南灣海景酒店