周秀娜：我唔介意全裸

否認發明星夢

被喻為新一代性感女神的Chrissie深明自己優點，亦明白客戶及傳媒需要，故此在鏡頭前從不吝惜展示驕人身材。甫出道已熟悉娛樂圈規則的她，原來從未發過明星夢。

我出道首個工作，就係靠「翻版樂基兒」個名以三點式比堅尼上陣。我入行經過其實幾老套，就係喺街上被星探發掘。之後我膽粗粗去試鏡，結果成功得米。我唔覺得自己發明星夢，我從來冇諗過可以發展娛圈事業，我細個鍾意睇時裝書，亦鍾意睇模特兒行騷，不過最鍾意睇電影，可以話影響我日後成長路。

過分性感被斥不雅

提起周秀娜，總離不開「性感」兩字，她的成功造就了o靚模誕生，與身材毫無睇頭的Angelababy一齊改變高挑模特兒的壟斷局面。問到憑「胸」出位，當中有否掙扎過？

我個人觀感以美作準則，作為一個專業模特兒唔應該受性感所限，無論着內衣、泳衣或者真空上陣都OK。我覺得最緊要做足安全措施防走光，性感我接受到。有報道指唔少家長話我形象過分性感，甚至意識不良教壞細路，我完全唔覺得！因為好多時喺街都有家長主動上前同我打招呼，之後又鼓勵叫我畀心機，我聽到好開心，亦好安慰。

視模特兒為踏腳石

Chrissie曾先後拍攝電影《絕代雙嬌》、《關人七事》、《抱抱俏佳人》、《殭屍新戰士》以及《婚前試愛》等，當中她於《婚》片更與男主角羅仲謙大演床上戲。她坦言當模特兒是踏腳石，希望轉攻電影發展。

我想拍多啲唔同題材嘅電影，想喺電影圈大展拳腳，呢個係我現時人生最大嘅目標。我唔係因為性感形象太出位想洗底，要脫離o靚模行列，而係想畀人覺得我係有進步。做model我唔介意，但日後希望好似舒淇洗底成功，可以從電影方面認識我，唔想一提起「周秀娜」個名，會聯想o靚模或者性感。雖然我係電影新丁，演技仲好幼嫩，但希望自己可以拍到一部屬於自己嘅代表作。為咗磨練演技，暫時會接拍唔同類型題材電影，亦唔介意角色被醜化，因為每一個角色都有挑戰性。如果問我接唔接受到好似內地女星湯唯為藝術犧牲，喺電影《色，戒》嘅全裸演出，我會答你唔介意，但一切都要班底配合得好。我覺得自己暫時未去到呢個階段，依家講實在太早，好難答假設性問題，有時性感多與少都要視乎劇情同角色而定，為藝術而全裸，我唔知自己心理狀態可唔可以應付得到，但唔會抗拒。

羨慕前輩有好歸宿

每個年代都有性感女神，先有狄娜、夏文汐再到葉玉卿，後有朱茵再到徐若瑄，今日就有這個名字——周秀娜。

人人話我性感，我當然開心，但話我係性感女神真係唔敢當。其實我真係唔介意自己形象性感，只要係健康，出嚟效果有美感就OK。其實我好欣賞夏文汐，佢當年喺《唐朝豪放女》嘅大膽演出好激，相比我喺《婚前試愛》嘅演出，覺得自己係碎料。不過我最羨慕都係葉玉卿同邱淑貞，婚前為事業搏到盡，覓得好歸宿就放棄事業，一心做成功男人背後嘅女人，做個好太太、好媽媽。結婚對我嚟講好長遠，但同男友Avis感情好穩定。現階段我哋都係搏殺期，而且我對未來工作發展亦充滿憧憬。近期因為忙拍電影而忽略日本市場，我唔想有頭威冇尾勢，今年會專注番日本市場，仲希望開拓中國市場賺人仔，畢竟我喺潮州出世，哈哈……

葉玉卿與邱淑貞覓得好歸宿，令周秀娜羨慕。

邱淑貞

未經家人同意 先斬後奏出寫真

Chrissie搵錢伎倆層出不窮，出寫真集已是小兒科，為求新意，還推出攬枕、月曆，最後寫真集更加入「3D法國蜜月之旅」。問到一切是否經過深思熟慮？她想了想才回答：「我有問自己係咪鍾意呢行，我又唔係做錯事，每做一件事都有原因，雖然父母思想唔算開放，但管教都算嚴，佢哋知道自己個女唔係行差踏錯，認為形象性感健康都可接受。」

Chrissie更自爆當初是先斬後奏出寫真集：「哈……我可以話做人冇乜計劃，但一做就做到盡！總之寫真集出街前有畀爹哋媽咪睇，佢哋喺有心理準備下先出街。好開心最後得到家人支持，仲不時畀我意見同提點我。」雖然現在名成利就，但Chrissie卻失去陪家人的時間，故此她很珍惜與家人相聚，能夠一家人齊齊整整食飯已很滿足。

About周秀娜

洋名：Chrissie

年齡：25

三圍：32C、23、33

高度：170cm

體重：100磅

學歷：中五

服裝：bossini X M&M'S

採訪：劉慰思

攝影：黃叔榮