黃柏高回朝在望 太子黨有排震
成立兩年的金牌大風在除夕刮大風，集團主席鄭東漢（鄭中基之父）昨日發公開信宣告引退，由龐維仁接棒。以鄭中基（Ronald）為首的「太子黨」旋即瓦解，黨員梁漢文、方力申、鄧麗欣頓人心惶惶。據知，當年跟太子不和的黃柏高有機會重新掌權，翻身有望。
昨日金牌大風主席鄭東漢突然向傳媒和合作夥伴發公開信宣告引退：「我要作出任內最後一個公布，一年前，本公司引入了志同道合的投資夥伴，由龐維仁先生領導的太平洋資本投資亞洲有限公司，經過多月來的合作無間，砥礪切磋，我慶幸找到了交棒的人，去延續這條我走過的路。我不敢說功成，但人總有身退的時候。」
據知，事前金牌內部幾乎無人收到風聲，只是早兩天才在高層間暗傳，隨着鄭東漢的離開，當日失勢的黃柏高有機會翻身，據知，龐維仁入主後，不滿公司的業績表現，曾搵黃柏高密斟，此事令鄭東漢不是味兒，加上當年他真金白銀攞大筆錢收購EMI大中華，可惜遇市道不景，虧損甚巨，中間要引入龐維仁投資助周轉，仍未能扭轉乾坤，意興闌珊下決定賣股離場。
梁漢文感詫異
今次鄭東漢離開金牌，其子鄭中基太子地位勢必不保，昨晚他在深圳做倒數演出，至截稿前仍未有回覆。據知，一眾「太子黨」人心惶惶，加上龐維仁入主後曾傳減人工和花紅，令軍心更不穩。
剛於去年十一月續約的梁漢文接受本報訪問，他說：「今日下午鄭生（鄭東漢）打畀我，話呢個決定考慮咗一段時間，自己啱啱續約，聽到都好愕然、詫異，依家最緊要下面一班同事冇受影響，相信架構唔會有大轉變。」
會否擔心一朝天子一朝臣？他說：「預測唔到太多，不過自己唔擔心，冇乜太大憂慮，每個朝代梗有轉變。」梁漢文坦言一個月前曾與龐維仁飯局，雙方首次正式溝通，但否認對方一早部署安撫他：「佢從我角度了解公司。」問會否覺得被鄭東漢遺棄？他說：「唔會，始終佢經過長時間考慮。」
龐鄭關係良好
問到有冇聯絡Ronald了解？他坦言：「冇打畀佢，當然Ronald一早知呢件事，但鄭生叫佢唔好同大家講，所以我冇喺呢個時候搵佢。」梁漢文謂公司原計劃今年幫他出廣東碟、打入國語市場，並入紙申請年尾於紅館開騷，相信工作不受影響。至於「太子黨」鄧麗欣亦謂昨日收到鄭生電話通知：「知道佢想多啲時間陪屋企人，祝佢生活愉快。」
本報嘗試聯絡鄭東漢和黃柏高，但至截稿前未獲回覆，而龐維仁接受查詢時，被問是否想做娛樂大亨？他說：「唔好咁講，我哋生意人，都係因為睇好呢個business，件事本身有策略，1月4或5日會有記者會，到時先講。」提及有傳龐維仁嫌鄭東漢管理不善，他說：「千祈唔好咁講，我哋關係好好，佢賣股份前都諗住退休。」問是否搵黃柏高上位？龐維仁聞言謂要趕去派對即匆匆收線。
陳輝虹：運作不變
而金牌CEO陳輝虹則說：「鄭生退休啫，公司運作不變，過埋年同龐生開會。」有指龐生是生意人不熟娛樂圈，他說：「我哋一向跟鄭生意思做，依家只係轉型期。（有人事變動？）我覺得唔會囉。（黃柏高重掌唱片部？）你打電話問佢，佢適當時候會講。（歌手人心惶惶？）點會人心惶惶，歌手擔心係正常。（金牌賺唔到錢，鄭生唔玩？）唔係，賺幾多商業秘密。」
文：音樂組