王喜轉睇風水迴避事業線
林莉性感打扮與王喜結伴擔任剪綵嘉賓，擁有高挑身形的林莉配上高跟鞋到場，以強勁事業線「對準」王喜的頭部，令王喜需要趷高腳逃避「追擊」。
面對「港姐出身」的林莉「事業線」進攻，王喜不時「趷」高腳兼左閃右避，以逃避對方的事業線追擊，避開尷尬場面。問到林莉是否故意向王喜拋事業線，她說：「今日都唔係特別高啫。可能係佢唔知我會嚟，冇加墊墊高啲。」
林莉袋5位數
問到為何如此性感到場，她指因酬勞方面達五位數，與外地工作的酬勞相若，故「隆重少少」示人以示尊重。而王喜則以西裝打扮現身但卻與侍應相若，到剪綵時又自言似代客泊車服務員，他說：「諗住隆重其事，點知融為一體。」
王喜對於有指他拒絕陳志雲的建議為無綫續約三年，並有意退出幕前當風水師，王喜解釋：「唔係呢回事。陳志雲復職當中係唔會管理藝人，加上都未有人同我傾，點續約？（慳家坐地鐵？）我都係普通人，坐地鐵又唔係唔光彩，有乜問題？（做風水師？）人大咗工作到咗個樽頸位唔上唔落咁。想發展多個專長唔想獨沽一味。我自學咗兩年，如果成功掛咗牌，首一年會一蚊一次幫第一次搵我幫手嘅藝人。（陳志雲？）唔會嘞，佢係教徒。依家都係搵自己『較飛』。」
文：影視組