早前，李思捷與王祖藍、阮兆祥加汪明荃（阿姐）開咗兩場《荃加福祿壽宇宙最長演唱會》，李思捷嘅「緋聞女友」王宝宝（春卷）就睇足兩場，十分畀面，可惜男方一直唔肯承認身份，令春卷只得癡癡地等。阿姐更公開喺演唱會上面笑李思捷會送「李思捷瓜煲春卷」，搞到佢喺台上口窒窒，仲一時口快話冇食過春卷，令拍檔都忍唔住笑佢：「春卷你都冇食過？」
而演唱會之後嘅慶功宴上面，大家一度起哄叫李亞男、春卷等「家眷」同福祿壽合照，李亞男當然乖乖企定等影相，不過春卷就點都唔肯出嚟，到最後要阿姐出馬，親自拖佢出嚟影合照，認真大牌。其實佢兩個成日都出雙入對，戀情已經係公開的秘密，李思捷又唔係走偶像派路線，加上春卷年輕可愛，又唔係唔見得人，都真係唔明點解李思捷唔肯大大方方。