前組合Freeze成員陳樂榣（Alley）充滿藝術細胞，除了寫書、畫畫外，影相亦是她一大嗜好。經歷過膠卷菲林時期的她，愛把具紀念價值的相片「影上影」，將Hard Copy數碼化，方便隨時回味。
今年Alley獻出了不少第一次，除了開畫展外，七月亦首次嘗到作家滋味：「從來唔掂針黹嘅我，特登親手做咗一百隻貓頭公仔送畀簽名會嘅粉絲，喺澳門都搞咗簽名會，估唔到咁多人，有粉絲親手造咗個同書入面嘅貓一樣嘅蛋糕畀我，超感動。」
將舊照片「影上影」，傳入電話就可以隨時回味：「自細就好鍾意小朋友，成日將玩具當係自己細佬妹，最後得償所願。不過屋企重男輕女，而且細佬係天才兒童，我從此被忽略，但我仲係好錫佢，到依家都係。」
這堆絕對不是垃圾，是回憶：「第一次同朋友同居，就係何紫綸，嗰段時間真係好開心，最記得就係瘋狂喺屋企食大閘蟹，蟹殼簡直成個堆填區咁。」
自小愛畫畫的Alley早前舉行了首個個人畫展圓夢，當然要將展出作品影低留念，她說：「第一次開畫展，非常成功，畀咗我好大信心繼續踏上藝術之路。」