字圓其說：文詠珊模名火唔做o靚
「o靚模風」年前由文詠珊（Janice Man、JM）帶起，貴為「o靚模始祖」的她感嘆稱號變得負面，誓要搣甩「惡名」，亦想跳出老闆黎明所賜的「模Art」框框。今日的JM，不僅在衣着及談吐上有所改進，連社交圈子亦「升呢」，與黎明夫婦為伍。對於成功蛻變，JM最開心的，是可做回自己。
口述：文詠珊
筆錄：呂曉風、林嘉慈
JM與另一o靚模翹楚楊穎（Angelababy）曾幾何時是一對孖公仔，外貌、體形、氣質猶如雙生兒，工作上拍住搵銀，私底下同遊日本、生日獻吻。JM謂o靚模稱號已經過去，一對老友鬼鬼的「o靚模始祖」亦隨之成為歷史。
同Baby冇見呀，關係遠遠哋啦，大家各有發展，自己好衷心祝福佢囉！我相信佢都一樣，大家其實唔想再畀傳媒去挑撥關係，所以唔會喺呢方面講得太多，唔想因為第三方面令太多是非出現。
同樂基兒或每一個人好好朋友、好Sweet，公司唔算多人，一定融洽。我間中會返公司，Leon話不如叫JM返嚟公司見吓，未必一定有嘢傾，可能嗰期我做得唔錯，或者覺得我個樣有信心咗，佢會叫我返去鼓勵吓，見面傾偈已經好Sweet，佢講嘅係唔係金句，視乎你覺得係咪o架啫！我覺得佢好多嘢幾有深度，唔明會去問，佢會解釋，總之公司上下嘅人絕對開心，我心入面好幸福。
做好自己報答黎明
冇猶豫入呢間公司，對我嚟講係最適合，香港市場咁多女仔，好多人好靚好學識，點跳出個市場去令人認同好唔簡單，慶幸天時地利人和，我會珍惜，希望畀人覺得我唔淨係得個外表，我一直做好自己嘅嘢，相信係報答Leon嘅最好禮物。
仲要多謝醫學美容品牌Doctor Kits老闆娘搵我代言，佢好錫我，仲送靚袋畀我，我會成日做運動同美容去Keep靚自己。
遺傳疤痕增生阻戲路
JM轉攻大銀幕後不時夥拍猛人，她欣賞經驗老到的黃秋生帶動她入戲，踢爆張震得知她將銀幕初吻獻給自己時狂講Sorry，不過一心向影壇發展的JM，擔心先天遺傳病影響拍攝。
戲路一定唔會Block自己，乜都想試，但我最擔心自己嘅身子，我係好捱得，又唔係孱，但之前有套打戲，係我畀人打，好多動作要自己去就位，就算攝咗Pad，我個人真係比較薄，同埋唔係好識就力，如果真係打要花時間去學。同埋好擔心一個問題，文家有先天性遺傳，就係疤痕增生，有傷口嘅地方，條疤痕會脹起好唔番，其實呢個係最大困擾，做演員少不免受傷，冇可能吓吓搵替身，呢個我接受唔到。試過一次皮膚發炎好嚴重，濕疹令我耳仔敏感，依家就有疤痕，搞到我個耳窿埋咗口，爸爸開過刀都好唔番。
諗定生仔 傷口脹痛
我有同媽咪商量過生BB問題，靚都係其次，唔好以為埋咗口只係脹咁簡單，個傷口仲會痛o架，好慘！我真係想像唔到自然分娩，生BB呢個話題唔好講笑，要好認真去諗。
抗拒o靚模稱號大個女
o靚模由形容年輕模特兒，變質為形容賣弄「事業線」的少女，JM直言抗拒此稱號，而模Art在老闆黎明（Leon）一聲令下即變過時，那麼JM的新封號是甚麼？她說：「我係Janice Man。」
以前唔會抗拒同討厭o靚模，只係形容我後生，但依家抗拒，大家會覺得以前我做緊嘅嘢係健康，唔賣弄性感，或者唔會畀人反感，但依家呢一個已經唔係好尊重嘅形容詞，性質貶義咗，係賣弄性感，但自己冇咁做過，人哋仲咁稱呼我唔公平架嘛！同埋我慢慢大個啦，走嘅方向、風格、着衫、談吐，相信各樣都成長咗。
開心做番JM
Leon好細心，轉數好快，係好叻嘅藝人同老闆，當初起模Art個名純粹想幫我脫離嗰個（o靚模）稱呼，佢企喺我立場諗，點樣走出呢個框框，而Leon講咗模Art冇耐，已經Out咗。香港娛樂圈永遠都要有一個稱號，我唔會太介意，都係一個稱號啫，我始終係Janice Man。o靚模、模Art，依家已經skip咗，最開心係人哋叫番我做JM，做番自己。
攝影：沈健程
化妝：Gary Chung
髮型：yoyo@Hair Culture
場地：馬泰餐廳（奧海城）