黃秋生怒轟私隱署卸膊
黃秋生兒子數月前遭雜誌跟蹤偷拍，秋生遂透過律師去信個人資料私隱專員公署，要求徹查是否有人涉及侵犯私隱，但私隱署的回覆令秋生相當勞氣。
秋生怒轟私隱署作風官僚，他說：「本雜誌跟咗我個仔大半年，影佢同啲同學、老師返學、放學，喺學校嘅一舉一動，影嚟做乜？登咗出嚟搞到我個仔心情低落，本雜誌咁做係咪侵犯咗他人私隱？於是我搵律師發咗封信畀個人資料私隱專員公署，希望佢哋正視，點知佢哋回咗封信，話不接納我嘅投訴，話事件已經被報道咗出嚟，成為咗新聞，唔係私隱。呢個政府係咪空架？咁卸膊、咁牽強嘅理由都講得出！係咪因為我個仔唔係郭晶晶，冇紅外線偷拍單嘢咁受注目，所以就唔使點理都得？」
考慮移民
而問到他會否考慮採取進一步行動？他繼續勞氣稱︰「仲可以點行動？再搵律師、使夠十零廿萬為止呀？我對呢個政府心淡，唯一可以考慮嘅係考慮移民，去啲尊重個人私隱嘅地方生活。」
記者就黃秋生的批評致電個人資料私隱專員公署，發言人只精簡地回應：「個別人士嘅個案我哋不便透露。」
文：影視組