鄧麗欣拍韓妹恐3D獻細
鄧麗欣與韓國組合Y.E.S.昨日齊齊穿上熱褲拍月曆，更會加入近期大熱的3D效果。穿上七吋高踭鞋晒美腿的鄧麗欣笑言性感造型留畀Y.E.S.：「我3D咗都冇嘢睇，驚啲人會失望！」
鄧麗欣（Stephy）與韓國組合Y.E.S.合作跳舞歌，昨日她們齊齊以熱褲造型拍攝3D月曆。開工前，她們互送蛋撻及柚子蜜作見面禮。Stephy雖穿上七吋高踭鞋晒美腿，但性感程度不及穿小背心的Y.E.S.，Stephy謂：「性感留番畀佢哋，我嗰part唔會性感，我驚3D咗都冇嘢睇。（蝕底喎！）冇所謂，其實佢哋都唔會刻意性感。」她笑言不會爭取性感造型搶鏡，擔心騷胸冇睇頭：「我驚人哋話『3D咗o架喇？』！」
不介意與死敵同坐
Stephy透露與Y.E.S.合作跳舞快歌：「我會唱國語，自己都幾鍾意呢個新嘗試。」雖然現時她未有計劃到韓國發展，但自爆曾想到韓國學跳舞：「不過一去就要幾個月，所以放棄。（擔心畀人話個樣唔同咗？）唔會，依家去邊都可以整容，而且大家見到我就知有冇啦。」
有傳死敵傅穎與緋聞男友羅仲謙鬧翻，Stephy謂：「我冇睇呀，唔回應啦！」對於好姊妹吳雨霏表示會安排她與傅穎在其演唱會上齊齊坐，Stephy直言不會尷尬：「你哋（記者）最開心啦，總之我一定會去支持佢。」
文：音樂組