WG處女港騷《So Hot》驅寒
韓國女子組合Wonder Girls（ＷＧ）昨晚首次在港開騷，全場爆滿，WG以勁歌熱舞大扭S腰冧粉絲，令寒冷天氣立即升溫。
憑《Nobody》一曲紅遍全球的韓國女子組合Wonder Girls(ＷＧ)，昨晚假亞洲國際博覽館首度在香港舉行演唱會，全場座無虛席。甫開場，以黑色衫褲出場的ＷＧ，以藝恩、友彬、善藝、惠林以少少低胸裝示人，而惠林更唯一穿短褲演出，大晒美腿，無懼寒冷氣溫。五女出場先唱代表作《So Hot》和《I Wanna》作熱身，勁歌熱舞大扭Ｓ腰，令現場立即升溫，粉絲們更尖叫不停，其後眾女以廣東話講「大家好」向粉絲打招呼，令全場即時響起震耳欲聾的歡呼聲。
有興趣殺入影壇
ＷＧ日前受訪時透露將於明年再出新碟，收錄英語、國語及韓文歌，至於會否唱廣東歌？成員藝恩謂：「暫時仲未唱到廣東歌，但如果粉絲好熱情，又想我哋唱廣東歌，我哋都會滿足大家。」
ＷＧ在月底韓國上映的新片《Last Godfather》中客串演出，被問到有否興趣接拍電影或電視劇挑戰演技時，五女異口同聲稱大感興趣，昭熙與藝恩更表示想拍動作戲，友彬則謂想拍愛情片。
惠林趁機探家人
聖誕將至，藝恩表示完成事務所的聖誕騷後，會跟同門的2PM及miss A等歌手組合舉行聖誕派對。而ＷＧ所屬的事務所近日在香港舉行面試選拔新人，問眾女可有面試心得予參賽者？隊長善藝謂：「最重要係喺表演期間展示熱情，（好似惠林咁識多國語言會有優勢？）當然有，因為咁樣有助日後推出英文同國語歌。」而香港出生的惠林則趁今次開騷爭取與家人相處的時間。
文：外娛組